काठमाडौं । नेकपा (एमाले)का महासचिव शंकर पोखरेलले पार्टी आधारभूत वर्ग र समुदायबाट टाढिँदै गएको स्वीकार गर्नुभएको छ ।
आइतबार काठमाडौंमा आयोजित ‘वामपन्थी आन्दोलन अब के गर्ने ?’ विषयक राष्ट्रिय बहसमा बोल्दै महासचिव पोखरेलले पछिल्लो प्रतिनिधि सभा निर्वाचनमा एमालेले पार्टी सदस्य र उनीहरूसँग निकट समुदायको जनमतबाहेक अन्य वर्ग र समुदायको मत आकर्षित गर्न नसकेको बताउनुभयो ।
उहाँले वामपन्थी शक्तिहरू पूर्वाधार विकासमा बढी केन्द्रित हुँदा सामाजिक विकास, सामाजिक न्याय, शिक्षा, स्वास्थ्य र रोजगारीका मुद्दामा प्रभावकारी काम गर्न नसकेको बताउनुभयो ।
महासचिव पोखरेलका अनुसार नेपालको श्रमशक्तिको ठूलो हिस्सा कृषिमा निर्भर रहे पनि कृषिमा संलग्न परिवारका शिक्षित युवा कृषि पेसामा फर्कन नचाहँदा शैक्षिक बेरोजगारी बढेको छ । कृषिमार्फत रोजगारी सिर्जना गर्ने कार्यमा शिक्षित युवाको पर्याप्त संलग्नता हुन नसक्दा उनीहरूको असन्तुष्टि वैदेशिक पलायन र राज्यविरुद्धको आक्रोशमा परिणत भएको उहाँको भनाइ छ ।
उहाँले भन्नुभयो, “पार्टी सदस्य र त्यसको पेरिफेरीको सम्बन्ध नै कम्युनिष्ट जनमत होला । पार्टी सदस्य र उसको निकटको सदस्य आधारित जनमतबाहेक अन्य जनमत हामीले हासिल गर्न सकेनौँ । त्यसअर्थ अहिले हामी आधारभूत वर्ग र समुदायबाट पनि टुटेको अवस्थामा छौँ ।”
मुलुकको वर्तमान संकटको प्रमुख कारणमध्ये शिक्षित पुस्तामा बढेको बेरोजगारी र त्यसबाट उत्पन्न असन्तुष्टि रहेको उहाँले बताउनुभयो । कृषिलाई रोजगारीको आधार बनाउन नसक्दा शिक्षित पुस्ता शैक्षिक बेरोजगारका रूपमा समाजमा उपस्थित भएको र त्यसको असन्तुष्टि वैदेशिक पलायन तथा राज्यविरुद्धको आक्रोशमा बदलिएको उहाँको भनाइ थियो ।
महासचिव पोखरेलले पार्टीको समग्र पुनर्गठन आजको आवश्यकता रहेको बताउँदै वामपन्थी कार्यकर्तामा उत्पन्न निराशालाई उत्साह र गतिशीलतामा बदल्नुपर्नेमा जोड दिनुभयो ।
उहाँले आगामी दिनमा वामपन्थी दलहरूले जनतासँगको सम्बन्धलाई बलियो र सुदृढ बनाउन आवश्यक रहेको पनि बताउनुभयो ।
