काठमाडौँ । महिला एकदिवसीय विश्वकप २०२५ मा पुरस्कार रकम पुरुषहरूभन्दा बढी हुने भएको छ । अन्तर्राष्ट्रिय क्रिकेट परिषद् (आईसीसी) ले सोमबार यसबारे घोषणा गरेको छ ।
३० सेप्टेम्बरदेखि भारत र श्रीलंका आयोजना हुने प्रतियोगितामा कुल १३.८८ मिलियन अमेरिकी डलर (करिब १९५ करोड रुपैयाँ) पुरस्कार वितरण हुने छ । च्याम्पियन टोलीले ४.४८ मिलियन डलर (करिब ६२ करोड रुपैयाँ) पाउनेछ, जुन अहिलेसम्मको सबैभन्दा ठूलो पुरस्कार हो ।
उपविजेता टोलीले २.२४ मिलियन डलर (करिब ३२ करोड रुपैयाँ) पाउनेछ भने सेमीफाइनलमा हारेका टोलीहरूलाई समेत १.१२ मिलियन डलर (करिब १६ करोड रुपैयाँ) वितरण गरिनेछ । समूह चरणको जितमा प्रत्येक टोलीलाई ३४,३१४ डलर (करिब ४८ लाख रुपैयाँ) दिइनेछ ।
कुल आठ शीर्ष टोलीले प्रतिस्पर्धा गर्ने यस प्रतियोगिताको पुरस्कार रकमलाई चार गुणा बढाइएको छ ।
