प्रिय भारत भाईजी
तपाँई हामी छिमेकी
पुरानो हाम्रो मित्रता
हजारौँ सालको सभ्यता
एउटै छ हाम्रो धर्म
वैदिक हिन्दु सनातन
जन्म देखि मृत्यु सम्म
उहि संस्कार चिन्तन
राष्ट्र यो हाम्रो नेपाल
पार्श्वमा रम्य हिमाल
उत्तरचीन दक्षिण भारत
छिमेकी छन् दुई विशाल
सनातन धर्मको उज्वल
सूर्य चन्द्राङ्कित ध्वज
लिएर उभियो नित्य
वैदिक धर्म निर्मल
यसमा गर्व हुनुपर्छ
मित्र भारतलाई पनि
किनकि सांस्कृतिक आत्मा
दुवैको वैदिकै छ नि
गत लामो इतिहासको
दुखद घटनादिले
पराधीन बन्यो भारत
भयो स्वाधीन अहिले
खुशी छौँ हामी धेरै नै
देखी स्वतन्त्र भारत
वैदिक संस्कृतिको देश
बढेको उन्नति पथ
वैदिक धर्म आदर्श
जगतकै मूल सभ्यता
जसका हौँ प्रणेता हामी
आपसमा राखौँ मान्यता
नेपाल देशको सम्मान
भारतले गर्नु पर्दछ
सांस्कृतिक दुई भाई
आपसमा मिल्नु पर्दछ
हुँदैन किचलो गर्न
सानो देशको सीमानामा
समझदारी देखियोस् है
कालापानी र सुस्तामा
सीमा क्षेत्रमा बारम्बार
नेपाली दुख पाउँछ
भारतजस्तो छिमेकीलाई
छैन है शोभनै अब
समान सांस्कृतिक दुई
पुराना सभ्यताहरु
अनावश्यक विवाद गर्दा
हाँस्ला संसार है बरु ११
