काठमाडौं । गत असार २४ गते ल्हेन्दे खोलामा आएको बाढीले बढाएको रसुवागढीस्थित नेपाल–चीन सीमामा रहेको पुल बगाएपछि आजदेखि त्यही ठाउँमा बेलिब्रिज निर्माण सुरु गरिने भएको छ । चीनले रसुवागढी नाकामा बेलिब्रिज निर्माण सुरु गर्न लागेको हो ।
नेपाल सरकार र चीनबीच भएको समझदारी अनुसार चिनियाँ पक्षले बेलिब्रिज निर्माण सुरु गर्न लागेको हो । यो पुल आगामी भदौ ३० गतेभित्र निर्माण सम्पन्न गर्ने लक्ष्य छ ।
सीमा नाकामा अवरुद्ध सडक सम्पर्क शीघ्र सुचारु गर्न अस्थायी रूपमा बेलिब्रिज निर्माणका लागि हिजो रसुवाका प्रमुख जिल्ला अधिकारी सहितको टोलीले निर्माणस्थलको अवलोकन गरेको थियो ।
त्यस्तै, शनिबार नै रसुवा र चीनका स्थानीय अधिकारी बीच निर्माणस्थलबाटै भर्चुअल बैठक सम्पन्न भएको छ ।
बैठकका क्रममा विपदको समयमा भएका उपद्वार, राहत एवम् विपदपश्चातको पुनर्निर्माण र पुनस्र्थापनाका विषयमा विस्तृत रूपमा द्विपक्षीय छलफल भएको जिल्ला प्रशासन कार्यालय रसुवाले जनाएको छ ।
प्रस्तावित बेलिब्रिजको यथाशीघ्र निर्माण सम्पन्न गर्नका लागि स्थानीय प्रशासनबाट उपयुक्त वातावरण निर्माणका गर्न आवश्यक समन्वय, सहकार्य र सहजीकरण गर्ने प्रतिबद्धता समेत व्यक्त भएको छ ।
