काठमाडौँ । नेकपा एमालेभित्र पूर्वराष्ट्रपति विद्यादेवी भण्डारीलाई पार्टी प्रवेश गराउन नहुने मत बढेको छ ।
केन्द्रिय कमिटीको सोमवार र मंगलवारको बैठकमा बोल्ने अधिकांश नेताहरुले भण्डारीलाई राजनीतिमा प्रवेश गराउन नहुने मत राखेका हुन् । उनीहरुले गणतन्त्रको गौरवको रुपमा रहिसकेको व्यक्ति कुनै दलमा आउने की नआउने कुरा प्राविधिक विषय मात्रै नभएको बताए । बैठकबारे जानकारी दिँदै पार्टीका प्रचार विभाग प्रमुख राजेन्द्र गौतमले गणतन्त्रको गौरवको रुपमा रहीसकेको व्यक्ति कुनै राजनीतिक दलमा प्रवेश गर्नेकुरा एउटा राजनीतिक दलको विषय मात्रै नभएको बताउनु भयो । उहाँले यो विषयलाई आागमी दिनमा पर्ने प्रभावलाई मध्यनजर गरेर संविधानको भावना र मर्मअनुसार नजिर स्थापित हुनेगरी निर्णय लिनुपर्ने बताउनु भयो । केन्द्रिय कमिटीको बैठकले यसबारे निर्णय लिने उहाँको भनाइ छ । एमालेमा १ लाख ३९ हजार पार्टी सदस्यता वृद्धि भएको पनि जानकारी दिनुभयो ।
उहाँले भन्नुभयो, ‘अहिलेसम्म केन्द्रिय कमिटीका ५८ जना सदस्यहरुले धारणा राख्नुभएको छ । अब ७७ जना बाँकी हुनुहुन्छ । बैठकमा पार्टी सदस्यताको विषय गम्भीरतापूर्वक उठेको छ । अधिकांश सदस्यहरुले पार्टी सदस्यता दुई वटा राख्नु उचित भएको बताउनुभएको छ । यसलाई सशक्त ढंगले कार्यान्वयन गर्नुपर्ने राय आएको छ । नेकपा एमालेको १ लाख ३९ हजार पार्टी सदस्यता वृद्धि भएको छ । २८ प्रतिशत सदस्य संख्या वृद्धि भएको छ । सरकारको प्रभावकारीता, महंगी नियन्त्रण, डेलीभरी व्यवस्थित गर्ने, सुशासन कायम गर्न विशेष जोड दिन सुझाव आएका छन् । पूर्वराष्ट्रपतिज्युको पार्टी सदस्यता नविकरण र पार्टीमा प्रवेश गर्नेकुरा अधिकांश सदस्यहरुले जिज्ञासा राखेका छन् । साझा व्यक्तित्व भइसकेको, गणतन्त्रको गौरवको रुपमा रहिसकेको व्यक्ति कुनै दलमा आउने की नआउने कुरा प्राविधिक र एउटा पार्टी विशेषको विषय होइन । यो नयाँ विषय हो । यसले भोलि जनतामा, प्रणाली, व्यवस्थामा के प्रभाव पर्दछ, संविधानको भावना र मर्मको कस्तो नजिर र अभ्यास हुन्छ भन्नेकुरामा पार्टीले स्पष्ट राजनीतिक निर्णय गर्नुपर्छ भन्ने अधिकांश केन्द्रिय सदस्यहरुको जोड छ । यो निकै महत्वको विषय भएकाले केन्द्रिय कमिटीको बैठकले निर्णय लिनेछ ।’
उहाँले पूर्वराष्ट्रपति भण्डारीलाई राजनीतिमा प्रवेश गर्न दिनेकुरा राजनीतिक आन्दोलनमा पार्ने प्रभावलाई ध्यानमा राखेर निर्णय हुने पनि बताउनु भयो ।
