काठमाडौँ । निर्वाचन प्रहरी, नेपाल प्रहरी र सशस्त्र प्रहरी बल, नेपालको पोशाक खरिदसम्बन्धी अध्ययन उपसमितिले १९ बुँदे कार्यविधि सर्वसम्मतिले पारित गरेको छ ।
बुधवार सिंहदरबारमा बसेको उपसमितिको पहिलो बैठकले कार्यविधि तथा कार्यअवधि सर्वसम्मतिले पारित गरेको हो । उपसमितिका सभापति एवं राष्ट्रिय स्वतन्त्र पार्टीका सांसद मनिष झाले सबै सदस्यले कार्यविधिमा हस्ताक्षर गरेको जानकारी दिनुभयो ।
उहाँका अनुसार विभिन्न निकायबाट प्राप्त कागजात तथा प्रमाणहरूको अध्ययन गर्ने प्रक्रिया पनि बैठकले तय गरेको छ । प्राप्त दस्तावेजको गोपनीयता कायम गर्दै सार्वजनिक लेखा समितिको सभाहलमै आवश्यक निगरानीका बीच अध्ययन गरिने उहाँले बताउनुभयो ।
उपसमितिले कुनै पनि कागजात बाहिर लैजान वा सार्वजनिक गर्न नपाउने व्यवस्था गरेको छ । उपसमितिको कार्यअवधि दुई महिना अर्थात् मंसिर २० गतेसम्म तोकिएको छ ।
सभापति झाले दशैँपछि मात्रै उपसमितिको अर्को बैठक बस्ने जानकारी दिनुभयो । चाडपर्वका कारण हुने लामो बिदा तथा सदस्यहरूको जिल्ला भ्रमणका कारण समय सीमित भएकाले प्राप्त कागजातको प्रभावकारी अध्ययन गर्नु चुनौतीपूर्ण रहेको उहाँले बताउनुभयो ।
उहाँले भन्नुभयो, “उपसमितिको आज पहिलो बैठक बसेको हो । बैठकले १९ बुँदे कार्यविधि र कार्यअवधि सर्वसम्मतिले पारित गरी सबै सदस्यले हस्ताक्षर गरेका छन् । विभिन्न निकायबाट प्राप्त कागजात तथा प्रमाणहरूको अध्ययन गर्ने प्रक्रिया पनि तय गरिएको छ । आगामी बैठक दशैँपछि बस्ने निर्णय भएको छ ।”
उहाँले कार्यविधि निर्माणभन्दा पनि चाडपर्व र समय अभावका कारण अध्ययन कार्यलाई प्रभावकारी रूपमा अघि बढाउनु मुख्य चुनौती रहेको बताउनुभयो ।
