काठमाडौँ । राष्ट्रिय प्रजातन्त्र पार्टीकी प्रमुख सचेतक खुश्बु ओलीले निर्वाचन प्रहरीको पोशाक खरिद प्रक्रियाबारे राजनीतिक आग्रह–पूर्वाग्रहभन्दा माथि उठेर निष्पक्ष अध्ययन गरिने बताउनुभएको छ ।
बुधवार सिंहदरबारमा बसेको निर्वाचन प्रहरी, नेपाल प्रहरी र सशस्त्र प्रहरी बल, नेपालको पोशाक खरिदसम्बन्धी अध्ययन उपसमितिको बैठकपछि सञ्चारकर्मीसँग कुरा गर्दै उहाँले सार्वजनिक लेखा समितिमा परेको उजुरीका आधारमा उपसमितिले तथ्य र कागजात अध्ययन गर्ने बताउनुभएको हो ।
उहाँले बेनामी उजुरीसमेत पर्न सक्ने भएकाले त्यसको अध्ययन गर्नु समितिको जिम्मेवारी भएको स्पष्ट पार्नुभयो । उपसमितिको काम छानबिन वा कारबाही गर्ने नभई तथ्य र कागजातका आधारमा अध्ययन गरी प्रतिवेदन तथा आवश्यक सिफारिस पेश गर्नु रहेको उहाँको भनाइ थियो ।
प्रमुख सचेतक ओलीले निर्वाचन प्रहरीको पोशाक खरिद प्रक्रिया सार्वजनिक खरिद ऐन तथा प्रचलित कानूनअनुसार भए–नभएको अध्ययन गरिने बताउनुभयो । उजुरी पर्दैमा कसैलाई दोषी ठहर गर्न नमिल्ने उल्लेख गर्दै उहाँले प्रत्येक उजुरीलाई तथ्य, प्रमाण र कानूनी प्रक्रियाका आधारमा हेर्नुपर्नेमा जोड दिनुभयो ।
उहाँले समितिमा फरक–फरक धारणा आउन सक्ने भए पनि सबैका विचारलाई सम्मानपूर्वक राखेर निर्णय प्रक्रियाबाट निष्कर्षमा पुगिने बताउनुभयो ।
‘उपसमितिको काम छानबिन वा कारबाही गर्ने होइन, तथ्य र कागजातका आधारमा अध्ययन गरी प्रतिवेदन र आवश्यक सिफारिस पेश गर्ने हो,’ उहाँले भन्नुभयो, ‘व्यक्तिगत धारणा वा राजनीतिक आग्रह–पूर्वाग्रहभन्दा माथि उठेर निष्पक्ष रूपमा अध्ययन गर्नेछौँ ।’
ओलीले कागजात तथा तथ्यको अध्ययनपछि जे देखिन्छ, त्यसैका आधारमा प्रतिवेदन र सिफारिस तयार गरिने बताउनुभयो । उहाँले उपसमितिको जिम्मेवारी विधिको शासन, कानूनको पालना र निष्पक्ष अध्ययनमा केन्द्रित रहेको स्पष्ट पार्नुभयो ।
