काठमाडौं । प्रतिनिधिसभाको बैठक बस्दै नबसी स्थगित भएको छ । सूचना टाँस गरेर भोलि बिहान ११ बजेसम्मको लागि बैठक स्थगित गरिएको हो ।
नेपाल विद्युत प्राधिकरणबाट कुलमान घिसिङलाई हटाउने निर्णयको प्रधानमन्त्री केपी ओलीले स्पष्टीकरण दिनुपर्ने माग राख्दै प्रतिपक्ष दलहरुले सदन अवरोध गर्दै आइरहेका छन् ।
विपक्षीले प्रधानमन्त्रीले जवाफ दिनुपर्ने माग गरेपछि हिजो पनि विपक्षीको विरोधपछि स्थगित भएको सदन आज बिहान ११ बजेका लागि राखिएको थियो ।
तर, विपक्षीले अडान नछाडेपछि दिउँसो २ बजेसम्मका लागि स्थगित गरिएको थियो । सभामुख देवराज घिमिरेले दलका प्रमुख सचेतकहरुसँग संवाद गर्दा पनि कुरा नमिलेपछि भोलिसम्मको लागि बैठक स्थगित गरिएको हो ।
