काठमाडौं । सिके राउतको जनमत र रेशम चौधरीको नागरिक उन्मुक्ति पार्टीबीच पार्टी एकता निश्चित भएको छ ।
एकीकृत पार्टीको अध्यक्षमा डा सिके राउत, संरक्षक रेशम चौधरी र सहअध्यक्ष रञ्जिता श्रेष्ठ हुने सहमति भइसकेको जनमतका प्रवक्ता डा शरदसिंह यादवले जानकारी दिए ।
पार्टी एकताको लागि दुवै पक्ष सहमतिमा गठन गरिएको कार्यदलले प्रक्रिया थालेको यादवले बताए । पार्टीको नाम ‘नागरिक जनमत ‘राख्ने र चुनाव चिन्ह ‘ढकिया’ राख्ने बारेमा छलफल भइरहेको उनले बताए । छलफलको चरणमा रहेकोले पार्टीको नाम र चुनाव चिन्हबारे चाँडै सहमतिमा पुग्ने उनले बताए ।
त्यसैगरी, पार्टी पदाधिकारीसहित आवश्यक संरचना बारेमा पनि कार्यदलले नै टुंग्याउने यादवले बताए ।
कार्यदलमा जनमतबाट उपाध्यक्ष अब्दुल खान, डा. शरदसिंह यादव, बालगोविन्द चौधरी रहेका छन् भने नागरिक उन्मुक्तिबाट गंगा चौधरी, सुनिता चौधरी, रामलाल डगोरा थारु रहेका छन् ।
