काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आफूमाथि छलकपट गरेर सिध्याउन खोजेको आरोप लगाएका छन् । आफूमाथि गरिएको षड्यन्त्रमा सबै पर्ने चेतावनी समेत लामिछानेले दिएका छन् ।
आज आफ्नो मुद्दाको सुनवाइका लागि जिल्ला अदालत रुपन्देही पुगेका रविले सञ्चारकर्मीहरुसँग संक्षिप्त कुराकानीमा यस्तो प्रतिक्रिया दिएका हुन् ।
‘हामी निरन्तर बोलिरहेका छौं । म संसदमा छैन । छलकपट गरेर मलाई रोकेका छन् । एउटा कुरा चाहीँ भन्छु । मलाई पुर्न भनेर जुन खाल्डो खनेका छन्, यदि सानो खाल्डो त भए ममात्रै पुरिन्थेँ । तर, यति ठूलो खाल्डो खनियो कि यी सबै त्यसमा जाकिन्छन्,’ लामिछानेले भने ।
यस्तै, राजा फर्काउन सुरु भएको आन्दोलनका विषयमा सरकारले जवाफ दिनुपर्ने पनि उनको भनाई छ ।
आन्दोलनमा उत्रिएको समूह पनि जनता नै भएको भन्दै उनले भने, ‘यो दुई तिहाइको सरकार भन्या होइन र ? हामीले त भ्रष्टाचारविरुद्ध ठुलै अभियान सुरु गरेका थियौं । धेरै फाइल ओपन गरेका थियौं । ती सबै बन्द भए भन्ने सुनेको छु । सात महिनाअघि हामीले सरकार बुझाउँदा विभिन्न मानिसको गिरफ्तारी भएको थियो । माइतीघर मण्डला बन्द रहेकोमा हामीले खुला गरेका थियौँ । अहिले जे भइरहेको छ, त्यसको जिम्मेवारी त दुई तिहाइको सरकारले नै लिनुपर्छ । सरकारलाई सबै थाहा हुनुपर्ने हो । त्यो हजारौंको हुल जनताकै हो नि ।’
यस्तै, लामिछानेले आफू तयारीमा लागेको प्रस्ट पार्दै आफूले भन्ने कुराहरु बाँकी रहेको र जनताले हेरिरहेको बताए ।
आफू नबोले पनि पार्टीले निरन्तर बोलिरहेको उनको भनाई छ ।
