काठमाडौँ । त्रिकोणात्मक महिला अन्तर्राष्ट्रिय टि–ट्वान्टी शृङ्खलाअन्तर्गत तेस्रो खेलमा घरेलु टोली नेपाललाई नेदरल्याण्ड्सले चुनौतीपूर्ण लक्ष्य प्रस्तुत गरेको छ ।
नेदरल्याण्ड्सले नेपाललाई १४१ रनको लक्ष्य दिएको हो । कीर्तिपुरस्थित त्रिवि क्रिकेट मैदानमा टस जितेर ब्याटिङमा उत्रिएको नेदरल्याण्ड्सले निर्धारित २० ओभरमा ९ विकेट गुमाउँदै १४० रन जोड्यो ।
नेदरल्याण्ड्सका लागि कप्तान बाबेट डी लिडेले सर्वाधिक ४१ रनको योगदान दिइन् । यसैगरी हेदर सिजर्सले २६ रन बनाउँदा फेबे मोल्केनबोयर र रोबिन रिज्केले समान २१ रन जोडे ।
बलिङमा नेपालकी सिता रानामगर एक्लैले ५ विकेट लिइन् । यस्तै, मनिषा उपाध्यायले २ तथा कविता जोशीले १ विकेट लिइन् ।
जारी प्रतियोगितामा नेपालले यसअघि खेलेको दुवै खेलमा हार बेहारेको थियो । नेपाल आफ्नो पहिलो खेलमा नेदरल्याण्ड्ससँग २० रनले पराजित भएको थियो भने दोस्रो खेलमा थाइल्यान्डसँग चार विकेटको पराजित भएको थियो ।
पहिलो खेलमा नेपाललाई पराजित गरेको नेदरल्याण्ड्स आफ्नो दोस्रो खेलमा थाइल्यान्डसँग आठ विकेटको पराजित भएको थियो ।
