दलीय सहमति जुट्न नसकेपछि प्रदेश नं २ नाम र राजधानी मतदानबाट टुङ्गो लगाइने भएको छ । दलहरुबीच प्रदेको नाम र राजधानीका सम्बन्धमा पुरानै अडानमा रहेकाले मतदानमार्फत टुङ्गो लगाउन लागिएको हो ।
दलीय सहमतिका लागि प्रदेशको नामका लागि चार र राजधानीका लागि तीनवटा प्रस्ताव राखिएको थियो । सभामुख सरोजकुमार यादवको संयोजकत्वमा गठित विशेष समितिले ती प्रस्तावमा सहमति जुट्न नसकेपछि आइतबार प्रदेशसभामा प्रतिवेदन पेस गरिसकेको छ ।
आज सोमबार ११ बजे बस्ने प्रदेशसभाको बैठकमा राजधानी तथा नामकरणसम्बन्धीका प्रस्तावमाथि जारी छलफलपछि मतदानमार्फत राजधानी टुङ्गो लगाइने बताइएको छ ।
प्रतिवेदनमा राजधानीका लागि जनकपुरका लागि एउटा, वीरगञ्जआसपाससहितको क्षेत्रलाई एउटा र अर्को वीरगञ्ज उपमहानगरपालिकालाई मात्र गरी प्रस्ताव पेस गरिएको छ ।
छलफलमा मधेश केन्द्रित दलहरु जसपा, लोसपा तथा माओवादी केन्द्र मधेशको पक्षमा लागेका छन् । नेपाली कांग्रेस मिथिला भोजपुरा र नेकपा एमालेले जानकी प्रदेशमै आफ्नो पुरानै अडानमा छन् ।
प्रदेशको नामकरणका लागि प्रदेशसभामा दुई तिहाइ मत आवश्यक रहेको अवस्थामा दलहरुको अडानले दुई तिहाइ पुग्ने सम्भावन कम रहेको देखिन्छ । सभामुखसहित १०४ सदस्य रहेको प्रदेशसभामा दुई तिहाइ सङ्ख्या पुर्याउन कम्तिमा ७० सदस्यको समर्थन चाहिन्छ । मधेशको पक्षमा जसपाको ३९, लोसपाका १६ र माओवादी केन्द्रका आठ गरी ६३ सदस्य रहेका छन् । यसरी प्रदेशको नाम मधेश नाम राख्न पनि कम्तीमा सात मत नपुग्ने देखिएको छ ।
