एजेन्सी । भारत र अष्ट्रेलियाबीचको बोर्डर–गावस्कर ट्रफीको चौथो टेस्ट मेलबर्नको एमसीजी (मेलबर्न क्रिकेट ग्राउण्ड)मा जारी छ । अष्ट्रेलियाले टस जितेर पहिले ब्याटिङ गरिरहेको छ ।
विश्व टेस्ट च्याम्पियनसिपको फाइनलमा पुग्न दुवै टोलीका लागि यो खेल निकै महत्वपूर्ण छ । जसको दबाब दुवै टोलीका खेलाडीमा देखिएको थियो ।
ओभर सकिएपछि कोहलीले खेलमा डेब्यु गर्दै आएका अष्ट्रेलियाका ब्याट्सम्यान साम कोन्स्टासलाई काँधमा जानाजान धक्का मारेका थिए । दुवैबीच झगडा पनि भएको थियो । यसपछि आईसीसी म्याच रेफ्रीले कोहलीलाई म्याच फीमा २० प्रतिशत जरिवाना लगाएका छन् । योसँगै उनलाई एक डिमेरिट पोइन्ट पनि दिइएको छ ।
खेलको १० औं ओभर सकिएपछि विराट कोहली आफ्नो फिल्डिङ पोजिसनमा गइरहेका थिए । यस क्रममा उनले ब्याट्सम्यान कोन्टासलाई काँधले धकेले । १९ वर्षीय कन्स्टासलाई यो कुरा मन परेन र उनले कोहलीलाई केही भने । अम्पायरले हस्तक्षेप गरेर मामिला शान्त गर्नुपरेको थियो ।
विराट कोहलीले आईसीसी नियमको अनुच्छेद २.१ उल्लङ्घन गरेका छन् । क्रिकेटमा कुनै पनि किसिमको अनुपयुक्त ‘शारीरिक टकराव’ प्रतिबन्धित छ। खेलाडीले जानाजानी वा लापरवाहीका कारण कुनै खेलाडी वा अम्पायरसँग ठोक्किएमा त्यसलाई आचारसंहिता उल्लङ्घन मानिनेछ ।
यसपछि बुमराह खेलको ११ औं ओभर बलिङ गर्न आएका थिए । बुमराहको ओभरमा कन्स्टासले २ चौका र १ छक्का प्रहार गरे । यो ओभरमा १८ रन बन्यो ।
केही पूर्वक्रिकेटरले कोहलीको यो व्यवहारको आलोचना गरेका छन्। अस्ट्रेलियाका पूर्व कप्तान रिकी पोन्टिङले विराट कोहलीको गल्तीमा कुनै शंका नभएको बताएका छन्। भारतीय क्रिकेट टोलीका पूर्व प्रशिक्षक रवि शास्त्रीले विराट कोहलीको यस्तो व्यवहारलाई अनावश्यक भनेका छन्।
आफ्नो डेब्यू टेस्टमै कन्स्टासले मात्र ५२ बलमा अर्धशतक पूरा गरेका थिए। उनी खेलको २० औं ओभरमा ६० रन बनाएर आउट भएका थिए। रविन्द्र जडेजाले उनको विकेट लिए। कन्स्टासले ६५ बलमा ६० रनको बनाउदा ६ चौका र २ छक्का प्रहार गरेका थिए।
