काठमाडौँ । रियल मड्रिडका फरवार्ड भिनिसियस जुनियनरले फिफाको उत्कृष्ट वर्ष खेलाडी अवार्ड प्राप्त गरेका छन् ।
जुनियनरलाई मंगलबार दोहामा आयोजित कार्यक्रमबीच उक्त अवार्ड प्रदान गरिएको हो । यस्तै, रियलकै कार्लो एन्सेलोटी फिफा द बेस्ट २०२४ मा वर्षको उत्कृष्ट प्रशिक्षक चुनिए ।
महिलातर्फ बार्सिलोनाकी मिडफिल्डर आइटाना बोनमतीले यो अवार्ड जितिन् । बालन डे’अर अवार्ड जित्न असफल रहेको दुई महिनापछि २४ वर्षीय भिनिसियसले यसपल्ट यो सफलता चुमेका हुन् ।
त्यति बेला म्यानचेस्टर सिटीका रोड्रिले बालोन डे’अर जितेका थिए । रियल र भिनिसियसले त्यो कार्यक्रम नै बहिस्कार गरेको थियो ।
अवार्ड पाएपछि ब्राजिली खेलाडीले भने, ‘आज म त्यो केटालाई लेख्दैछु जसले धेरै ट्रफी उठाएको देखेको छ । उसको समय आएको छ । मेरो समय आएको छ । हो, म संसारको उत्कृष्ट खेलाडी हुँ र मैले यसको लागि कडा संघर्ष गरेको छु । म निकै गरिब परिवारमा हुर्केको हुँ । मेरो समाजमा हिंसा अत्याधिक थियो । त्यस्तो परिस्थितिबाट अगाडि आएका सबैलाई यो अवार्ड समर्पित गर्न चाहन्छु ।’
अर्जेन्टिनाका लियोनल मेसीले यस अघिका दुई संस्करणका फिफा अवार्ड जितेका थिए । गत सिजन भिनिसियसले रियलका लागि सबै प्रतियोगिताका ३९ खेलमा २४ गोल गरे । यस्तै ११ गोलमा असिस्ट पनि रह्यो ।
त्यसक्रममा भिनिसियसले रियलका लागि स्पेनी ला लिगा र युरोपली च्याम्पियन्स लिग पनि जितेका थिए । महिलातर्फ भने २६ वर्षीया बोनमटीले लगातार दोस्रो वर्ष यो अवार्ड प्राप्त गरिन् ।
