काठमाडौँ । सिद्धार्थ बैंक नेपाल प्रिमियर लिग (एनपिएल)को तेस्रो खेलमा जनकपुर बोल्ट्सले कर्णाली याक्सलाई पराजित गरेको छ ।
भर्खरै सम्पन्न खेलमा जनकपुले कर्णालीलाई ८ विकेटले हराउँदै प्रतियोगितामा लगातार दोस्रो जित निकालेको हो ।
१४२ रनको लक्ष्य पछ्याएको जनकपुरले १५ ओभरमा २ विकेटको क्षतिमा लक्ष्य भेट्टायो । जनकपुरका लागि अनिल शाहले अर्धशतकीय पारी खेले । उनले अविजित ६१ रन जोडे । ४१ बल खेलेका उनले ६ चौका र ३ छक्का प्रहार गरे ।
यस्तै, आशिफ शेखले ३६ रन जोड्दा लाहिरु मिलन्थाले २४ तथा जेम्स निसम १६ रनमा अविजित रहे । कर्णालीका जिशन मकसुद र मौसम ढकालले एक–एक विकेट लिए ।
त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ गरेको कर्णालीले निर्धारित २० ओभरको खेलमा सात विकेट गुमाउँदै एक सय ४१ रन बनायो ।
कर्णाली याक्सका लागि गुल्सनकुमार झाले २७ बल खेल्दै तीन छक्का र एक चौकाको सहयोगमा सर्वाधिक ३६ रन जोडे ।
त्यस्तै अर्जुन घर्तीले २२ बलमा दुई चौका र दुई छक्का हान्दै ३३ रन बनाए । यस्तै कप्तान सोमपाल कामीले अविजित २९ रनको योगदान दिए । उनले १३ बल खेल्ने क्रममा एक छक्का र तीन चौका प्रहार गरे । भारतीय खेलाडी शिखर धवनले १४ बल खेल्दै तीन चौकाको मद्दतमा १४ रन बनाए । यस्तै हङकङका बाबर हायातले १२ रन बनाए ।
बलिङतर्फ जनकपुर वोल्ट्सका लागि पाकिस्तानी खेलाडी मोहम्मद मोहसिन खानले दुई, जिमी निशम, हर्ष ठाकेर, ललितनारायण राजवंशी र किहोर महतोले एक-एक विकेट लिए ।
