एजेन्सी । आगामी फेब्रुअरीमा हुने आईसीसी च्याम्पियन्स ट्रफी हाइब्रिड मोडलमा हुनेछ । अर्थात् पाकिस्तानसँगै यस प्रतियोगिताका खेलहरू तटस्थ स्थानमा खेलाइनेछन् ।
समाचार एजेन्सी पीटीआईका अनुसार पाकिस्तान क्रिकेट बोर्ड (पीसीबी)ले शनिबार आईसीसीको बैठकमा टीम इन्डियाका खेलहरू तटस्थ स्थानमा खेलाइने प्रस्तावलाई स्वीकार गरेको छ ।
तर, पाकिस्तानले आईसीसीसँग केही शर्त राखेको छ । पीसीबीले आफ्नो आर्थिक वर्षको राजस्व ५.७५ प्रतिशतले बढाउन चाहन्छ । साथै, २०३१ सम्म भारतमा हुने सबै प्रमुख कार्यक्रमहरू हाइब्रिड मोडेलमा हुनुपर्छ ।
भारतले यस प्रतियोगितामा आफ्नो टोली पाकिस्तान पठाउन अस्वीकार गरेको थियो । सुरुमा पाकिस्तान भारत पाकिस्तान आउनैपर्छ भन्ने अडानमा थियो । तर, भारतको कडा अडानपछि पाकिस्तान क्रिकेट बोर्ड अन्ततः हाइब्रिड मोडलमा सहमत भएको छ । यसअघि शुक्रबारको हाइब्रिड मोडलसम्बन्धी बैठक शनिबारसम्मका लागि स्थगित गरिएको थियो ।
सुरक्षाका कारण भारतीय टोली पाकिस्तान नजाने
पाकिस्तानले च्याम्पियन्स ट्रफी आयोजना गर्ने अवसर पाएदेखि नै भारतीय टोलीले पाकिस्तान जान नमान्ने अनुमान गरिएको थियो । भारतले यसअघि सन् २०२३ मा हुने एसिया कप खेल्न पाकिस्तान जान अस्वीकार गरेको थियो । त्यसपछि एसिया कपमा भारतका खेलहरू श्रीलंकामा भएका थिए ।
पाकिस्तान क्रिकेट बोर्ड (पीसीबी)ले यसअघि भारतका सबै खेल लाहोरमा गराउने र खेलपछि खेलाडीलाई भारत पठाउने प्रस्ताव राखेको थियो । भारतले यसलाई स्वीकार नगरेपछि पीसीबीले हाइब्रिड मोडलका लागि पनि अस्वीकार गरेको थियो ।
पाकिस्तानको टोली गत वर्ष एकदिवसीय विश्वकप खेल्न भारत आएको थियो । १४ अक्टोबरमा भारत र पाकिस्तानबीचको खेल अहमदाबादमा भएको थियो । यो खेलमा भारतीय टोली ७ विकेटले विजयी भएको थियो ।
भारतीय टोलीले सन् २००७–०८ देखि पाकिस्तान भ्रमण गरेको छैन । सन् २००८ मा मुम्बईमा भएको आतंकवादी हमलापछि भारत सरकारले पाकिस्तानमा क्रिकेट खेल्न अस्वीकार गरेको थियो । त्यसपछि दुवै टोलीले आईसीसी र एसीसी प्रतियोगितामा मात्रै खेल्छन् । सन् २०१३ देखि दुवै टोलीले १३ ओडीआई र ८ टी–२० खेल तटस्थ स्थानमा खेलेका छन् । सन् २००९ मा पाकिस्तानमा श्रीलंकाली टोलीमाथि पनि आतंकवादी हमला भएको थियो ।
