काठमाडौं । प्रधानमन्त्री कप टी–२० क्रिकेट प्रतियोगिताको उपाधिका लागि नेपाल पुलिस क्लव र एपीएफ क्लव भिड्ने भएका छन । सेमिफाइल खेलमा एपीएफले अर्को विभागिए टिम त्रिभुवन आर्मी क्लवलाई ४७ रनले पराजित गर्दै फाइनलमा स्थान बनायो भने नेपाल पुलिसले बागमती प्रदेशलाई ५० रनले पराजित गर्दै फाइनलका लागि स्थान बनाएका हुन् ।
त्रिवि क्रिकेट मैदान कीर्तिपुरमा टस हारेर पहिला ब्याटिङ गरेको एपीएफले उत्कृष्ट ब्याटिङको नमूना प्रस्तुत गर्दै २ विकेटको क्षतिमा २३० रन बनायो । एपीएफका लागि प्रदीप ऐरी र आशिफ शेखको जोडीले ओपनिङ गरेको थियो । यो जोडीले पहिलो विकेटका लागि १५० रनको सानदार साझेदारी गरेको थियो । आक्रामक ब्याटिङ गरेका आशिफ ८४ रन बनाएर पभेलियन फर्किए । उनले ४३ बलमा ५ छक्का तथा १० चौका प्रहार गरेका थिए ।
यसैगरी टिमको स्कोर १६२ रन हुँदा एपीएफका कप्तान शरद भेषावकर दोस्रो विकेटको रुपमा आउट भएका थिए । त्यसपछि क्रिजमा आएका लोकेश बमले पनि उत्कृष्ट पारि खेले । १८ बल खेलेका लोकशले ६५ रनको नटआउट पारि खेलेपछि एपीएफको स्कोर २३० रन पुगेको थियो ।लोकेशले ९ छक्का र २ चौका प्रहार गरेका थिए ।
यसैगरी ओपनिङ आएका ऐरी ५७ रनको नटआउट पारि खेले । उनले ५३ बल फेस गर्दा १ छक्का र ७ चौका प्रहार गरे । सुमित श्रेष्ठ र जितेन्द्र मुखियाले एक एक विकेट लिए । जवाफमा आर्मी क्लव २० ओभरमा नौ विकेट गुमाउँदै एक सय ८३ रनमा रोकियो । राम्रो सुरुवात गरेपछि उसका मध्येक्रमका खेलाडी सस्तैमा आउट हुँदा हार्न पुग्यो ।
यस्तै आज भएको पहिलो खेलमा पुलिसको दिएको १५६ रनको लक्ष्य पच्छ्याएको बागमती प्रदेश ८ विकेट गुमाएर १०५ रनमा रोकिए पछि पुलिस ५० रनले विजयी भएको थियो । टस जितेर पहिला ब्याटिङ गरेको पुलिसले निर्धारित ओभरमा ५ विकेट गुमाएर १५५ रन बनायो । पुलिसका लागि पवन शर्राफले अर्धशतकीय पारि खेले ।
उनले ५४ बलमा ३ छक्का र ३ चौकाको मद्दतले ५९ रन बनाएका थिए । ओपनिङ आएका शंकर राना ८ रन बनाएर आउट हुँदा पुलिसले २७ रनमा पहिलो विकेट गुमाएको थियो । त्यसपछि क्रिजमा आएका दीपेन्द्रसिंह ऐरी खाता नै नखोली आउट हुन पुगे । २७ रनमै दोस्रो विकेट गुमाएको पुलिसको पारिलाई पवन र अनिल साहले अघि बढाएका थिए । तेस्रो विकेटको रुपमा अनिल आउट हुँदा पुलिसको स्कोर १०५ रन भएको थियो । १५.१ ओभरमा अनिल व्यक्तिगत २५ रन बनाएर पभेलियन फर्किएका थिए ।
