वासिङ्टन । टेस्ला र स्पेसएक्स कम्पनीका सीईओ एलन मस्कले विश्वलाई गम्भीर चेतावनी दिएका छन् । मस्कले पृथ्वीमा जनसङ्ख्या निकै तीव्र गतिमा घट्दै गएको र अवस्था यस्तै रहे मङ्गल ग्रहका लागि मानिस कम हुने बताएका छन्। संसारका सबैभन्दा धनी व्यक्ति मस्कले मानिसहरूलाई सकेसम्म धेरै बच्चाहरू जन्माउन सल्लाह दिए। जनसङ्ख्या अचानक घट्दै गएकोमा बढी चिन्तित हुनुपर्ने उनको भनाइ थियो ।
एलन मस्कले एकपछि अर्को ट्विट गर्दै संयुक्त राष्ट्रसङ्घमाथि आफ्नो आक्रोश पोखेका छन् । पृथ्वीका लागि पर्याप्त मानिस नभएको खण्डमा मङ्गल ग्रहका लागि पनि पर्याप्त नहुने उनको भनाइ छ । उनले संयुक्त राष्ट्रसङ्घको अनुमान पनि मूर्खतापूर्ण रहेको बताए। “गत वर्ष जन्मेका बच्चाहरूको सङ्ख्याले आयुको अनुमानलाई गुणन गर्नुहोस्। बाल जन्मदर घट्दै गएको छ । यदि परिवर्तन भएन भने यो एक उत्कृष्ट उदाहरण हो”, उनले भने ।
‘भविष्यमा जापानमा ६ करोड ८० लाख मानिस मात्र रहनेछन्’
जापानमा बालबालिकाको जन्मदर उल्लेख गर्दै मस्कले गत वर्ष जापानमा आठ लाख शिशु जन्मिएको र आयु ८५ वर्ष रहेको जुन निकै उच्च रहेको बताए । दुवैलाई गुणन गर्ने हो भने भविष्यमा जापानमा छ करोड ८० लाख मात्रै जनसङ्ख्या बाँकी रहन्छ । अहिले जापानको जनसङ्ख्या १२ करोड ६० लाख छ । विश्वमा ठूलो सङ्ख्यामा मानिसहरुले सन्तान नजन्माउने निर्णय गरिरहेका बेला एलन मस्कले यस्तो चेतावनी दिएका हुन्। जलवायु परिवर्तन, असमानता र आर्थिक सरोकारका कारण मानिसहरूले बच्चा नजन्माउन चाहिरहेका हुन् ।
यसैबीच अमेरिकामा जनसङ्ख्या वृद्धि दर कोरोना महामारी सुरु भएयताकै न्यूनस्तरमा पुगेको छ । महामारीका कारण आप्रवासन रोकिएको छ र महिलाहरूले गर्भधारण गर्न ढिलाइ गरिरहेका छन्। योसँगै महामारीका कारण हजारौंको ज्यान गएको छ । जुलाई २०२० र जुलाई २०२१ को बीचमा अमेरिकाको जनसङ्ख्या केवल ०.१ प्रतिशत अर्थात तीन लाख ९२ हजार ६६५ ले बढेको छ। उता चीनमा महामारीको यो अवधिमा बच्चा जन्माउनेमा उल्लेख्य कमी आएको छ ।
