काठमाडौँ । च्याम्पियन्स लिग फुटबलमा इटालीयन क्लब एसी मिलानले स्पेनिस क्लब रियल मड्रिडलाई हराएको छ । गएराति भएको खेलमा मिलानले रियललाई उसकै घरेलु मैदानमा ३-१ गोलले हराएको हो ।
खेलको १२ औं मिनेटमा मालिक थिअले गोल गर्दै मिलानलाई सुरुवाती अग्रता दिलाएका थिए । २३ औं मिनेटमा भिनिसियस जुनियरले पेनाल्टीमार्फत गोल गर्दै रियललाई १-१ गोलको बराबरीमा ल्याए ।
यता, ३९ औं मिनेटमा अल्भारो मोराटाले र ७३ औं मिनेटमा तिजानी रेइज्न्डर्सले गोल गर्दै मिलानलाई ३-१ को जित दिलाए । योसँगै ४-४ खेल खेलेका रियल र मिलानले ६-६ अंक जोड्दै तालिकाको १७ औं र १८ औं स्थानमा छन् ।
यस्तै, गएराति नै भएको अर्को खेलमा इंग्लिस क्लब लिभरपुलले जर्मन क्लब लिभरकुसेनलाई ४-० गोलले हरायो । लिभरपुललाई फराकिलो जित दिलाउन लुइस डियाजले ह्याट्रिक गरे भने एक गोल कोडी गाक्पोले थपे । डियाजले ६१, ८३ र ९०+२ मिनेटमा गोल गर्दै ह्याट्रिक पूरा गरे ।
४ खेलमा शतप्रतिशत जित निकालेको लिभरपुल १२ अंकका साथ शीर्षस्थानमा छ । लिभरकुसेन ७ अंकका साथ ११ औं स्थानमा छ ।
