काठमाडौँ । महानगरपालिकाकी उपमेयर सुनिता डंगोलले नेपाल सम्वतलाई हरेक नेपालीले बुझ्ने संवत बनाउनुपर्ने बताउनुभएको छ ।
नेपाल संवत ११४५ को अवसर पारेर शनिबार काठमाडौंमा वसन्तपुरमा आयोजित एक समारोहमा बोल्दै उहाँले सो आवश्यकता औंल्याउनुभएको हो ।
उपमेयर डंगोलले व्यवहारिक पक्षमा नेपाल संवत हरेकले लागू गर्दै आएको भएपनि त्यसको महत्व बोध गराउने कार्यका लागि यसलाई प्रशासनिक रुपमा अघि बढाउने कार्यलाई पनि तिब्रता दिनुपर्ने स्पष्ट पार्नुभयो । उहाँले नेपाल संवतलाई सरकारले राष्ट्रिय संवतको मान्यता दिएको स्मरण गराउँदै त्यसको प्रयोगलाई अघि बढाउने कुरालाई दिनचर्याको रुपमा सबैले अघि बढाउनुपर्ने पनि बताउनु भयो ।
उपमेयर डंगोलले भन्नुभयो,‘व्यवहारिक पक्षमा हामीले मनाउँदै आईरहेको र लागू गर्दै आईरहेको नेपाल संवत, यसलाई भने हामीले अव बलियो बनाउने हो भने प्रशासनिक रुपमा यसको प्रयोगलाई कसरी अझ तिब्र गतिमा पु¥याउने हो, त्यसमा ध्यान दिनुपर्ने आवश्यकता देखिएको छ । राष्ट्रिय संवत राष्ट्रका हरेक व्यक्तिले बुझने संवत बनाउनु अहिलेको आवश्यकता पनि रहेको छ ।’
‘काठमाडौं महानगरपालिकाले हरेक वर्षजस्तै यस वर्ष पनि आजको यो समारोह गर्नका लागि सहयोग, साथ दिँदै आईरहेको छ । र आगामी दिनहरुमा पनि हामीले यसलाई निरन्तर रुपमा अघि बढाउने पनि यहाँहरुलाई जानकारी गराउन चाहन्छु । साथै सरकारबाट हामीले राष्ट्रिय संवत हुनुपर्छ भनिसकेका छौं । राष्ट्रिय संवत भईपनि सकेको छ । अब यसलाई लागू गर्नका लागि भने सरकारको पक्षबाट मात्र अपुग हुनसक्छ । हामीले दिनचर्यामा पनि प्रयोग गर्ने हामी सबैको जिम्मेवारी हो, दायित्व हो भनेर त्यो दायित्व बहन गरौं पनि भन्न चाहन्छु ।’
त्यस अवसरमा उपमेयर डंगोलले नेपाल सम्वत समारोहका लागि काठमाडौं महानगरपालिकाले सहयोग गर्दै आएको र त्यसलाई सदैव निरन्तरता दिने पनि बताउनु भयो ।
