काठमाडौँ। नेपाली खेलकुदको प्रतिष्ठित एनएसजेएफ पल्सर स्पोर्ट्स अवार्ड २०८२ को पिपल्स च्वाइस अवार्डको मनोनयन सार्वजनिक भएको छ ।
काठमाडौंमा आईतवार पत्रकार सम्मेलनमार्फत एनएसजेएफ पल्सर स्पोटर््स अवार्डअन्तर्गत २३ औं संस्करणको पिपल्स च्वाइस विधाका पाँच मनोनयन सार्वजनिक गरिएको हो ।
नेपाल खेलकुद पत्रकार मञ्च (एनएसजेएफ) ले २०५२ सालदेखि अवार्ड आयोजना गर्दै आएको छ । यसपल्ट नौ विधामध्ये पिपल्स च्वाइसमा भलिबलकी मिना सुनार, फुटबलर पूजा राना, कराते खेलाडी सानुमाया थिङ, क्रिकेटर शेर मल्ल र मिक्स मार्सल आट्र्स (एमएमए) का रविन्द्र ढाँट छन् ।
मञ्चका सचिव अनिल मल्ल ठकुरी सम्मिलित पाँच सदस्यीय खेलाडी छनोट समितिले उक्त नाम छनोट गरेको हो । भलिबलमा मीना शक्तिशाली स्पाइकरका रूपमा उदाउँदै छिन् । काभा महिला च्याम्पियनसिपमा प्रभावशाली प्रदर्शन गरेकी सुनारले काभा महिला क्लव च्याम्पियनसिपमा पुलिसलाई तेस्रो स्थान दिलाउन योगदान गरेकी थिइन् ।
फुटबलमा पूजाले पनि अन्तर्राष्ट्रिय स्तरमा आफ्नो क्षमता देखाएकी छन् । एशियन कप छनोटमा रहेकी पूजाले विदेशका व्यावसायिक लिगमा समेत प्रभाव छाडेकी छन् ।
उनी भुटानको ट्रान्सफर युनाइटेड तथा बंगलादेशका फरासगन्ज एफसी र नासरिन स्पोटर््स एकेडेमीबाट आबद्ध भएर खेलिसकेकी छन् । करातेकी सानुमायाले पनि अन्तर्राष्ट्रिय प्रतियोगितामा निरन्तर सफलता हासिल गरिरहेकी छन् ।
इजिप्टमा भएको विश्व कराते च्याम्पियनसिपमा एकल कातामा प्रतिष्पर्धा गरेकी थिङले २१औं एशियन कराते च्याम्पियनसिपमा पदकका लागि प्रतिष्पर्धा गरेकी थिइन् । उनी दक्षिण एसियाली कराते च्याम्पियनसिपमा टिम कातामा स्वर्ण र एकल कातामा रजत विजेता हुन् ।
क्रिकेटमा शेरले छोटो समयमै उल्लेखनीय छाप छाडेका छन् । आइसिसी टी ट्वान्टी विश्वकपमा डेब्यु खेलमै पहिलो बलमा विकेट लिएका मल्लले मलेसियामा भएको एशियन गेम्स क्वालिफायरमा हङकङविरुद्ध चार तथा मलेसियाविरुद्ध तीन विकेट लिए । मिक्स मार्सल आट्र्समा रवीन्द्र ढाँट ‘बझाङका बाघ’का रूपमा परिचित छन् । रोड टु यूएफसीको सेमिफाइनल पुग्ने पहिलो नेपाली फाइटर बनेका ढाँटले नेपाली एमएमएलाई अन्तर्राष्ट्रियस्तरमा चिनाउने सम्भावना बोकेका छन् ।
खल्तीसँग सम्झौता
खेलकुद पत्रकार मञ्च र विद्युतीय भुक्तानीका लागि चर्चित सेवाप्रदायक कम्पनी खल्ती बाई आइएमईबिच आईतवारै भोटिङ पार्टनरका रूपमा प्रायोजन सम्झौता भएको छ ।
सम्झौता पत्रमा खल्ती बाई आइएमईकी मेनेजर पुजा धामी र नेपाल खेलकुद पत्रकार मञ्चका अध्यक्ष निरञ्जन अधिकारीले हस्ताक्षर गरेका थिए ।
एनएसजेएफले पिपल्स च्वाइस अवार्डको मत खल्ती मार्फत गर्नेछ । सो अवसरमा धामीले यस वर्ष पनि जोडिन पाउँदा खुशी लागेको बताउँदै खेलाडीको सम्मानमा मञ्चले गर्ने यो ग्रान्ड कार्यक्रम सरहानीय कार्य हो, भनिन् ।
यसैगरी मञ्चका अध्यक्ष अधिकारीले आईएमई खल्ती परिवारप्रति कृतज्ञता व्यक्त गर्दै खल्तीले स्पोट्र्स अवार्डलाई थप उचाइमा लग्ने विश्वास व्यक्त गरे ।
यसैगरी महासचिव अञ्जन खड्काले यस सम्झौताले स्पोट्र्स अवार्डलाई थप उचाइमा लैजाने अभियानमा आईएमई खल्ती परिवारप्रति निरन्तर सहकार्यका लागि आभार व्यक्त गरे । –न्युज एजेन्सी नेपाल
