काठमाडौँ । इंग्लिस क्लब म्यान्चेस्टर युनाइटेडले मुख्य प्रशिक्षक एरिक टेन ह्यागलाई बर्खास्त गरेको छ ।
५४ वर्षीय ह्यागलाई क्लबले सोमबार आकस्मिक रुपमा बर्खास्त गरेको हो । जारी प्रिमियर लिगमा युनाइटेडको प्रदर्शन खस्किएको छ । टोली ९ खेलमा ११ अंकसहित तालिकाको १४ औं स्थानमा छ ।
क्लबले प्रशिक्षकलाई बर्खास्त गरिएको सन्देश दिँदै विज्ञप्तीमा भनेको छ– ‘एरिक टेन ह्यागले म्यानचेस्टर युनाइटेड पुरुषको पहिलो टोलीको व्यवस्थापकको रूपमा आफ्नो भूमिका छोडेका छन् । एरिकले हाम्रो साथको समयमा गरेको सबै कुराको लागि हामी कृतज्ञ छौं र भविष्यको लागि उनलाई शुभकामना दिन्छौं ।’
साथै, क्लबले रुड भान निस्टेलरोयले अन्तरिम मुख्य प्रशिक्षकको रूपमा टोलीको जिम्मेवारी लिने पनि जानकारी गराएको छ ।
२०२२ अप्रिल २१ मा उनी युनाइटेडको मुख्य प्रशिक्षक नियुक्त भएका थिए ।
