काठमाडौँ । महानगरीय अपराध महाशाखाले पुरातात्विक महत्वका सामग्री चोरी कार्यमा संलग्न दुई व्यक्तिलाई पक्राउ गरेको छ ।
पक्राउ पर्नेमा दाङ तुल्सीपुर उपमनपा–३ घर भई हाल काठमाडौँ बसुन्धरा बस्ने १८ वर्षीय सुमन शर्मा र रुकुम पश्चिम मुसिकोट नपा– ११ घर भई हाल काठमाडौँ केशरमहल बस्ने ३६ वर्षीय बिरबहादुर सुनार रहेका छन् ।
निजहरुबाट २०७२ सालको बिनाशकारी भूकम्पले क्षतिग्रस्त भई प्रबलिकरणको कार्य भइरहेको केशरमहलभित्रको केशर पुस्तकालयमा रहेका पुरातात्विक सामग्री बरामद भएको हो ।
निजहरुबाट दुई वटा तरबार, बाघको जस्तो टाउको देखिने एउटा वस्तु, दुई थान मोबाइल, गोल्डस्टार कम्पनीको एक जोर जुत्ता र बा ४२ प २६९४ नम्बरको स्कुटर बरामद गरिएको महाशाखाले जनाएको छ ।
निजहरुलाई थप अनुसन्धान र कानूनी प्रक्रियाका लागि महानगरीय प्रहरी वृत्त, दरबारमार्ग पठाइएको छ ।
