काठमाडौँ । नेपाल पत्रकार महासंघका कार्यवाहक अध्यक्ष रमेश विष्टले राजिनामा दिएका छन् । सदस्यता शुद्धीकरणमा देखिएको जटिलताबाट निर्वाचन सम्पन्न हुन नसकेपछि विष्टले राजीनामा दिएका हुन् ।
राजनीतिक दल आवद्ध पत्रकारका संगठनले समयमा पत्रकार महासंघको निर्वाचन गराउन नदिएको आरोप विष्टको छ ।
यसअघिका महासंघका अध्यक्ष विपुल पोखरेलले पनि गत भदौ २४ गते निर्वाचन गराउन नसक्ने भन्दै पदबाट राजिनामा दिएका थिए ।
नियमित रुपमा महासंघको निर्वाचन भएको भए गत असार २६ मा हुनुपर्ने थियो तर महासंघमा सदस्यता विवादका कारण चुनावको मिति सर्दै आएको थियो ।
उनले शुक्रबार जारी गरेको विज्ञप्तिमा लेखिएको छ, ‘व्यक्तिगत र पदाधिकारीको हैसियतले सदस्यताको छिनाझप्टीमा कतै संलग्न नभएपनि २०८१ साल असोज १२ गते तोकिएको निर्वाचन हुन नसकेकोसहित महासंघबाट भएका सबै कमजोरीहरुको नैतिक जिम्मेवारी लिदै कार्यवाहक अध्यक्षबाट राजीनामा दिएको छु।’
उनले राजनीतिक दल आवद्ध पत्रकारका संगठनले महासंघको विधि विधान र संरचनालाई समेत लत्याएर पत्रकारितासँग साइनो नभएका करिब साढे ४ सय व्यक्ति सदस्य थप्न बाध्य बनाएको बताएका छन् ।
पत्रकार महासंघको नयाँ नेतृत्व चयनका लागि यही असोज १२ गते मतदान गर्ने कार्यतालिका थियो । त्यसका लागि उम्मेदवारको मनोनयन दर्ता असोज ४ गते (आज) निर्धारण गरिएको थियो । तर विवादका कारण महासंघको नयाँ नेतृत्व चयन अनिश्चित बन्न पुगेको छ ।