काठमाडौँ । संविधान दिवसको अवसरमा धरहरा अस्थायी रूपमा सर्वसाधारणका लागि निःशुल्क खुला गरिने भएको छ ।
गत बिहीबार बसेको मन्त्रिपरिषद् बैठकले असोज ३ गतेदेखि धरहरा सञ्चालनमा ल्याउने निर्णय गरेको थियो । उक्त निर्णयअनुसार भोलिदेखि धरहरा सञ्चालनमा आउन लागेको हो ।
भोलिदेखि धरहरामा दैनिक करिब ५०० जनालाई चढ्न दिने गरी व्यवस्थापन गर्न लागिएको छ । अर्को निर्णय नभएसम्मका लागि धरहराको प्रवेश टिकट निःशुल्क गरिने बताइएको छ । धरहराभित्रको पार्किङ पनि निःशुल्क हुनेछ ।
दुई वटा विद्युतीय लिफ्टको प्रयोग गरेर धरहरा चढ्नेहरुले माथि पुग्न र तल झर्न सक्नेछन् । धरहरा चढेकाहरुले करिब १० मिनेट मात्रै यसको बार्दली क्षेत्रमा बिताउन पाउने तथा फोटो भिडियो खिच्न समेत दिइने छ ।
अहिलेसम्म धरहरा निर्माणको ९५ प्रतिशत मात्रै काम सम्पन्न भएको छ । तत्कालीन समयमा प्रधानमन्त्री केपी शर्मा ओलीले ११ वैशाख २०७८ मा आधा काम सम्पन्न हुन नपाउँदै धरहराको उद्घाटन गर्नुभएको थियो ।
उद्घाटनपछि पनि निर्माण चलिरहेकाले धरहरा चढ्नका लागि खुला गरिएको थिएन । ओली पुनः प्रधानमन्त्री भएपछि धरहरा चढ्न पाउने प्रबन्ध मिलाउने गरी मन्त्रिपरिषदबाट निर्णय गर्नुभएको हो ।
