संसदको गरिमा बचाउन उपसभामुखले राजीनामा दिनुपर्छ: सांसद गिरी

काठमाडौँ ।नेकपा(एमाले)का सांसद पदम गिरीले संसदको गरिमालाई बचाउनका लागि उपसभामुख इन्दिरा रानाले पदबाट राजीनामा दिनुपर्ने बताउनुभएको छ ।

मंगलवार प्रतिनिधि सभा बैठकको विशेष समयमा बोल्दै सांसद गिरीले उपसभामुख रानाले संसद बाहिरका व्यक्तिहरुलाई अमेरिका लान आफ्नो लेटरप्याड प्रयोग गरी दुतावासमा पत्र लेख्नुले संसदको गरिमामा आँच पुगेको बताउनु भयो । उहाँले उपसभामुखको कदमले सांसदहरुको शिर निहुराएको र लज्जित बनाएको बताउनु भयो । उहाँले उपसभामुखले पदीय मर्यादा अनुरुप काम गर्न नसकेको भन्दै पदबाट राजीनामा दिन आग्रह गर्नुभयो । उहाँले उपसभामुखले संसदको मर्यादा र गरिमालाई कायम राख्न नसकेको बताउनु भयो । संसदको मर्यादा कायम राख्नका लागि उपसभामुखको राजीनामा आउनुपर्ने उहाँको भनाई छ ।

उहाँले भन्नुभयो – ‘संसदको गरिमामय व्यक्ति उपसभामुख । उहाँले गर्ने काम, व्यवहारहरु, उहाँले लिने निर्णयहरु निश्चित रुपमा यो संसदको अत्यन्तै कन्र्सनको विषय रहन्छ । संसदको गरिमासँग यो विषय जोडिन्छ भन्ने कुरा हामी सबैले ध्यान राख्नुपर्छ । उपसभामुखले अमेरिकाको न्युर्योक शहरमा महिलाहरुको एउटा कार्यक्रममा जानको निम्ति आफ्नो लेटरप्याड प्रयोग गरेर त्यो पनि वैदेशिक रोजगारी व्यवसायीहरुको मिलेमतोमा संसदबाहिरका ४/५ जना मान्छेहरुलाई कार्यक्रममा जानका निम्ति दुतावासमा पत्र लेखेर दुतावास धाउने कुराले यो सिंगो संसदको गरिमामा आँच आएको छ कि छैन ? सार्वभौमसत्ता सम्पन्न यो संसदका सदस्यहरुको शीर निहुरिएको छ कि छैन ? यस्ता कुराहरुले लज्जित बनाउँछ । यो कुनै प्रतिशोधको कुरा होइन ।

उपसभामुखज्यूले आफ्नो पदिय मर्यादा अनुरुपको काम गर्न सक्नुभएन । सम्मानित संसदको मर्यादा र गरिमालाई कायम राख्न सक्नुभएन । ३/४ महिनाको अवधिमा उहाँले सोच्नुहोला । उहाँ आवद्ध रहेको दलसँग पनि बसेर छलफल गर्नुहोला र यसपछि निकास दिनुहोला भन्ने हामीलाई लागेको थियो । आज यत्तिका समयसम्म हामीले हेर्‍यौँ । यसमा कुनैपनि कदम नचालेपछि स्वभाविक रुपमा यो बाहिर चासोको विषय बन्यो । संसद भित्रको विषय पनि बनेको हो । त्यसकारणले म आग्रह गर्न चाहन्छु, उपसभामुखले यो संसदको गरिमालाई बचाउनका निम्ति पनि उहाँले आफ्नो पदबाट राजीनामा दिएर मार्ग प्रशस्त गर्दा यो संसदको गरिमा उँचो हुन्छ । सिंगो संसदको मर्यादाको निम्ति उहाँले यो कदम चाल्नुपर्छ ।’

उहाँले उपसभामुखले निकास दिनुहोला भन्ने सोचेर अहिलेसम्म बाटो हेरेको भएपनि अहिलेसम्म कुनै सम्बोधन नभएपछि यो विषय संसदभित्र प्रवेश गरेको बताउनु भयो ।