पिपुल्स डिस्पेन्सरी फर सिक एनिमल्स (पीडीएसए) नामक बेलायती संस्थाले मागावा नामक मुसालाई स्वर्ण पदक दिइएको छ । कम्बोडियामा ल्यान्ड माइन पत्ता लगाएर मानिसको ज्यान बचाएकोमा एउटा मुसालाई नायकको उपाधि दिएको हो। लामो समय द्वन्द्वमा फसेको कम्बोडियामा दशौँ लाख ल्यान्डमाइन बिछ्याइएका थिए। त्यस्ता बम पड्किँदा सालैपिच्छे दर्जनौँ मानिस मारिने र घाइते हुने गर्छन्। ती बम हटाउन कम्बोडियाले अझै विदेशी सहयोग लिइरहेको छ। तर, यो निकै जटिल काम हो।
मान्छेले टेक्नेवित्तिकै त्यस्ता बम विस्फोट हुन्छन्। तर, मुसाको तौल कम भएकाले बम टेकेपनि पड्किँदैन। मागावाले गत सात वर्षमा ३९ वटा ल्यान्डमाइन र २८ वटा विस्फोट नभएका बम फेला पारेको थियो। सो क्रममा उसले ३५ एकड जमिन जोखिमरहित बनाउन भूमिका खेलेको थियो।
मागावा अफ्रिकन जायन्ट पाउच्ड प्रजातिको मुसा हो र यसलाई तालिम दिन पनि सजिलो हुने बताइएको छ। मागावालाई विस्फोटक पदार्थ सुँघेर पत्ता लगाउने तालिम दिइएको थियो।
