एजेन्सी । इंग्ल्याण्डका पूर्व क्रिकेटर ग्राहम थोर्पेले गत हप्ता आत्महत्या गरेका थिए ।
थोरपेको मृत्यु भएको ७ दिनपछि सोमबार उनकी श्रीमती अमान्डाले थोर्पेले आत्महत्या गरेको खुलासा गरेकी हुन् । यसअघि पनि उनले यस्तो प्रयास गरेको खुल्नमा आएको छ ।
अमान्डाले पूर्व इंग्ल्यान्ड कप्तान माइकल एथर्टनलाई एक अन्तर्वार्तामा भनिन् कि थोर्पे खराब स्वास्थ्यका कारण डिप्रेसन र चिन्ताबाट पीडित थिए, जसका कारण उनले आफ्नो ज्यान गुमाए । थोर्पेले मृत्यु हुनु अघि आफैंसँग लामो मानसिक र शारीरिक युद्ध लडेका थिए ।
थोर्पेको ५५ वर्षको उमेरमा अगस्ट ५ मा निधन भएको थियो । उनको निधनको घोषणा इङ्ल्यान्ड एण्ड वेल्स क्रिकेट बोर्ड (ईसीबी)ले गरेको हो । त्यतिबेला मृत्युको कारण भने खुलाइएको थिएन ।
थोर्पेले सन् १९९३ देखि २००५ सम्म इंग्ल्याण्डका लागि १०० टेस्ट खेलेका थिए । यसका साथै उनी इंग्ल्याण्डको सिनियर पुरुष टिमको ब्याटिङ प्रशिक्षक पनि भइसकेका थिए । उनी २०२२ देखि गम्भीर बिरामी थिए । उनी अफगानिस्तानको मुख्य प्रशिक्षकमा पनि नियुक्त भएका थिए । तर, उनले आफ्नो कार्यकाल पूरा गर्न सकेनन् ।
