काठमाडौँ । नेकपा (एमाले)का मुख्य सचेतक महेश बर्तौलाले ओली सरकारले राष्ट्र र जनताको हितमा सामर्थ्यका साथ काम गर्ने बताउनुभएको छ ।
आज काठमाडौँको कलंकीमा भएको थाहा–काठमाडौं सम्पर्क मञ्चको दोस्रो भेलामा बोल्दै उहाँले ओली सरकार आफ्नो पुर्ण सामर्थ्यका साथ जनताको हितमा काम गर्ने बताउनु भएको हो । यस्तै, उहाँले अहिलेको समीकरणको सरकारले नै गणतन्त्रलाई केन्द्रमा राखेर संविधान संशोधन गर्ने पनि बताउनुभयो ।
कार्यक्रममा बोल्दै बर्तौलाले भन्नुभयो – २०७४ सालको आम निर्वाचन पछि चालू खर्च बढेर आयो । यो कसरी घटाउने भनेर सोँच्ने बेला आयो । वडा सदस्य देखि संघीय सांसद सम्मको जनप्रतिनिधिहरु सडक, बाटो पुल भनेर हिँडेको छ । कानुन कसले बनाउने ? विकास कसले गर्ने ? सेवा प्रवाह कसले गर्ने ? भन्ने अन्योल रहेको छ । स्थानीय सरकारलाई दैलोदैलोमा सेवा प्रवाहमा लगाउनुपर्छ । प्रदेश सरकारलाई विकासको कामको जिम्मा दिनुपर्छ तर मन्त्रीमण्डल भने कम गराउनुपर्छ र संघीय जनप्रतिनिधिहरुलाई पुर्ण रुपमा कानून निर्माणमा लगाउनुपर्छ ।यो बहसको बिषय हो, निर्णय भने होइन ।’
एमाले केन्द्रीय सदस्य समेत रहनुभएका बर्तौलाले भन्नुभयो ‘एमालेबाट उम्मेदवार भएर निर्वाचित भएका जनप्रतिनिधिहरुले सुतेर बिताएका छैनन् ।’
उहाँले थानकोट–चित्लाङ सडकलाई सम्झँदै भन्नुभयो – निर्वाचनमा घर दैलो गर्दा थाहाको जनताक्क एउटै माग थियो थानकोट–चित्लाङ सडक । मैले निर्वाचित भए यता थप सुदृढिकरण भइसकेको छ । गएको आर्थिक वर्षमा ८ करोडको बहुवर्षिय ठेक्का लगाएका छौं । अहिले पनि ४ करोड ३६ लाख बजेट छुट्टिएको छ । म यसलाई पनि बहुबर्षिय ठेक्का लगाउन पहल गर्छु र मेरो कार्यकालमा यो सडकको कालोपत्रे पुर्ण रुपमै टुंगाएर छोड्छु ।’
