काठमाडौँ । आइतबार प्रधानमन्त्री केपी शर्मा ओलीले संसद्बाट दुईतिहाइ मत पाएपछि वरिष्ठ अधिवक्ता डा. भीमार्जुन आचार्यले देशका सडकको अवस्थाबारे प्रधानमन्त्रीको ध्यानाकर्षण गराएका छन् ।
उनले प्रधानमन्त्रीलाई एक पटक काठमाडौंदेखि दाउन्नेसम्म यात्रा गरेर काम अघि बढाउन सुझाव दिएका छन् ।
‘प्रधानमन्त्रीलाई संसद्मा दुईतिहाइ बढीको विश्वासको मत प्राप्त भएको छ । यसको भरपुर सदुपयोग गर्ने बचन प्रधानमन्त्रीले दिनुभएको छ ’, उनले भनेका छन्, ‘पहिलो काम एकपटक तत्कालै काठमाडौंबाट दाउन्नेसम्मको यात्रा गाडीमा गर्नुपर्यो ।’
यस्तै, उनले दशैँ आउनुपहिले पूर्व, पश्चिम, उत्तर, दक्षिण सबैतिरका राजमार्गहरू यात्रा गर्न लायक हुनुपर्ने सुझाव प्रधानमन्त्रीलाई दिएका छन् ।
‘दशैं आउनु पहिले पूर्व, पश्चिम, उत्तर, दक्षिण सबैतिरका राजमार्गहरू यात्रा गर्न लायक हुनुपर्छ । अरू “ठूला”काम त्यसपछि गरे हुन्छ प्र.म. ज्यू । ’ उनले भनेका छन् ।
काठमाडौंदेखि पृथ्वी राजमार्ग हुँदै मुग्लिन–नारायणगढ सडक छिचोल्दा ज्यान जोगाउनै मुश्किल भएको छ भने उता नारायणगढदेखि नवलरासी हुँदै दाउन्नेसम्मको सडकको हालत ‘विजोग’ रहेको छ ।
