काठमाडौँ । टी–२० विश्वकपमा क्यानडाले पहिलो जित हात पारेको छ । प्रतियोगितामा पहिलो पटक खेलेको यो टोलीले आयरल्याण्डलाई १२ रनले पराजित गरेको हो ।
लगातार दोस्रो खेलमा टेष्ट खेल्ने राष्ट्रले तल्लो वरीयताको टोलीसँग हार बेहोरेको छ । एक दिनअघि पाकिस्तानी टोली अमेरिकाको सिकार बनेको थियो ।
न्युयोर्कको नासाउ काउन्टी स्टेडियममा आयरल्याण्डले टस जितेर बलिङ रोजेको थियो । क्यानडाले २० ओभरमा ७ विकेट गुमाएर १३७ रन बनाएको थियो । जवाफमा आयरल्यान्डले २० ओभरमा ७ विकेट गुमाएर १२५ रन मात्र बनाउन सक्यो ।
खेलको प्लेयर अफ द म्याच निकोलस किर्टन भए । उनले ४९ रनको महत्वपूर्ण इनिङ खेले । साथै श्रेयस मोभ्वासँग ७५ रनको महत्वपूर्ण साझेदारी गरे ।
निकोलस किर्टनले ४९ र श्रेयस मोभाले ३७ रन बनाए । यी दुईबीच पाँचौं विकेटका लागि ७५ रनको साझेदारी भयो । क्रेग योङ र ब्यारी म्याकार्थीले २–२ विकेट लिए । मार्क एडेयर, ग्यारेथ डेलानी र कर्टिस क्याम्फरले समान १–१ विकेट लिए ।
रन पछ्याउने क्रममा आयरल्याण्डका लागि मार्क एडेयरले अविजित ३४ र जर्ज डकरेलले अविजित ३० रन बनाए । दुवैले ६२ रनको साझेदारी गरे । डिलोन हेलिगरले २ विकेट लिए । जेरेमी गोर्डन, जुनैद सिद्दिकी र साद बिन जफरले एकएक विकेट लिए ।
