काठमाडौँ । त्रिकोणात्मक टी–२० अन्तर्राष्ट्रिय सिरिजअन्तर्गत नेपालले नामिबियालाई पराजित गर्यो । कीर्तिपुरस्थित त्रिवि मैदानमा शुक्रबारनेपालले नामिबियालाई ३ रनले पराजित गरेको हो ।
नेपाललाई नाटकीय जित दिलाउन अन्तिम ओभरमा करण केसीले उत्कृष्ट बलिङ गरे । त्यसअघि नामिबियाका ब्याट्सम्यानसँग चुटिएका करणले अन्तिम ओभरमा भने कसिलो बलिङ गर्दै नतिजा नेपालको पोल्टामा पारे । नामिबियालाई अन्तिम ओभरमा १२ रन आवश्यक थियो । तर उसले ९ रनमात्रै जोड्यो ।
करणले ४ ओभरमा ४९ रन खर्चिएर २ विकेट लिए । अन्तिम ओभरमा बलिङ गर्नुअघि नै उनले ४१ रन खर्चिसकेर महँगो सावित भएका थिए । तर, कप्तान रोहित पौडेलले करणलाई विश्वास गर्दै उनको हातमा बल थमाए ।
खेल सकिएपछि पत्रकारहरुसँग कुरा गर्दै करणले आफूले धेरै रन खर्चिएको र अन्तमा आफूले नै खेल जिताउनुपर्ने ठानेको बताएका छन् । उनले पोस्टम्याच कन्फरेन्समा भने – ‘मलाई कस्तो फिल भयो भने मैले नै फसाएको गेम हो मैले नै निकाल्नुपर्छ भन्ने लाग्यो रोहित(कप्तान)ले नी भने मैले नै बलिङ गर्छु भनेर । ममा कन्फिडेन्ट पनि थियो । कप्तान रोहितले पनि समर्थन गरे ।’
