काठमाडौँ। नेपाली काँग्रेसका नेता विमलेन्द्र निधीले वर्तमान सरकार संसद र जनताप्रति उत्तरदायी हुन नसकेको आरोप लगाउनुभएको छ ।
जनकपुरधाममा आयोजित नेपाली काँग्रेसको १५ औँ महाधिवेशन लक्षित अन्तरक्रिया कार्यक्रममा बोल्दै नेता निधीले सरकारले संसदीय गरिमा र जवाफदेहितालाई उपेक्षा गरेको बताउनुभएको हो ।
नेता निधीले लोकतन्त्रमा सरकारको वैधता र प्रभावकारिता संसदप्रतिको उत्तरदायित्वमा निर्भर रहने उल्लेख गर्नुभयो । शासन सञ्चालनका सन्दर्भमा सरकारले प्रदर्शन गरेको कार्यशैलीप्रति टिप्पणी गर्दै उहाँले बदलाको भावनाले राजनीति नगर्न चेतावनी दिनुभयो
सरकारले पूर्वाग्रह राखेर अभियोग लगाउने तर अदालतले सफाइ दिने क्रम बढेको बताउनु भयो । नेता निधीले संघीयता कार्यान्वयनको पक्षमा समेत सरकार गम्भीर नभएको बताउनु भयो । प्रदेश सरकार गठन भएको लामो समय भइसक्दा पनि प्रदेशले आफ्नै प्रहरी प्रशासन र कर्मचारी संयन्त्र नपाउनु दुःखद् भएको उहाँको भनाइ छ ।
नेता निधीले भन्नुभयो, ‘लोकतन्त्रमा सरकार जनताप्रति उत्तरदायी हुनुपर्छ र त्यसको सबैभन्दा ठूलो माध्यम संसद हो । संसदलाई महत्त्व नदिनु र जवाफदेहिताबाट पन्छिनुले लोकतान्त्रिक प्रणालीलाई नै कमजोर बनाउँछ । अदालतले दोषी नदेख्ने तर सरकारले पक्राउ गरिरहने प्रवृत्तिले सरकारको काममा त्रुटी र कमजोरी रहेको पुष्टि गर्छ । बदलाको भावनाबाट सुशासन र विधिको शासन सञ्चालन हुन सक्दैन । प्रदेशको मातहतमा आफ्नै प्रहरी र कर्मचारी हुनुपर्नेमा वर्तमान सरकारले त्यसतर्फ ध्यान दिएको छैन । दुई तिहाइको बल छ भन्ने दलहरूले नै प्रदेशलाई अधिकार दिन कन्जुस्याइँ गर्दा संघीयता र प्रदेश संरचना कमजोर भइरहेको छ ।’
पार्टीको आन्तरिक मामिला र आगामी महाधिवेशनका सन्दर्भमा बोल्दै निधीले पार्टी एकता र विधि विधानको पालनामा जोड दिनुभयो । कानूनी र प्राविधिक विषयहरूमा अदालतबाट हुने पुनरावलोकनले सकारात्मक परिणाम दिनेमा आफू विश्वस्त रहेको उहाँले बताउनु भयो ।
पार्टी एकताका लागि महाधिवेशनलाई उपयोग गर्नुपर्ने र कार्यकर्ताहरूलाई गाउँ तथा वडा तहसम्म पुगेर संगठन सुदृढीकरणमा लाग्न उहाँले निर्देशन दिनुभयो । –न्युज एजेन्सी नेपाल
