काठमाडौँ । नेपाली राष्ट्रिय महिला टोलीलाई आज इतिहास रच्ने अवसर छ । अन्तर्राष्ट्रिय प्रतियोगितामा उपाधि जित्न नसकेको नेपाली टोलीले आज साउदी अरेबियामा जारी वाफ वुमेन्स च्याम्पियनसिपको फाइनल खेल्दैछ । राति पौने १० बजे सुरु हुने फाइनलमा नेपालले बलियो प्रतिद्वन्द्वी जोर्डनलाई पाएको छ ।
नेपालले समूह चरण र सेमिफाइनलमा उत्कृष्ट खेल खेलेको थियो । नेपाली टोलीका प्रमुख हतियार थिइन् साबित्रा भण्डारी ‘साम्बा’ । उनको अनुपस्थितिले फाइनल खेल सहज भने पक्कै हुनेछैन, त्यसमाथि जोर्डन जसले प्रतियोगिताका यसअघिका खेलमा उत्कृष्ट खेल प्रदर्शन गर्दै आफूलाई प्रमुख दाबेदार प्रस्तुत गरेको छ ।
सेमिफाइनलमा उसले प्यालेस्टाइनलाई ५–० गोल अन्तरले पराजित गरेको थियो । जारी प्रतियोगितामा विपक्षी चार टोलीको पोस्टमा १३ गोल गरेको जोर्डनले जम्मा एक गोल मात्रै खाएको छ ।
जोर्डन वाफ च्याम्पियनसिपको पछिल्लो तीन संस्करणसहित पाँच पटकको विजेता टोली समेत हो । विश्व वरियतामा नेपाल जोर्डनभन्दा ३१ स्थानमाथि छ । जोर्डन ७४औँ स्थानमा छ भने नेपाल १०५ औं स्थानमा छ ।
सावित्रीको ठाउँ कसले लिने भन्ने नेपाली टोलीमा चिन्ताको विषय रहेको छ । साम्बा एन अभान्ट ग्वेंगाम्पसँगको व्यावसायिक सम्झौताका कारण फ्रान्स जानु परेपछि उनी फाइनलमा उपलब्ध हुन सकिनन् । उक्त क्लबसँगको सम्झौताअनुसार उनलाई फिफा विन्डोको खेलमात्रै खेल्ने अनुमति थियो ।
समूह चरण र सेमिफाइनलका खेल फिफा विन्डोभित्र परे पनि फाइनल खेल फिफा विन्डो बाहिरको खेल भएकाले उनी फाइनल खेल्न नपाएकी हुन् ।
नेपालले समूह चरण र सेमिफाइनल गरी चार खेलमा कूल १५ गोल गर्दा दुई गोल मात्रै खाएको थियो । नेपालले गरेका १५ मध्ये ९ गोल साम्बा एक्लैले गरेकी थिइन् ।
