काठमाडाैँ । उद्योग, वाणिज्य तथा आपूर्तिमन्त्री गौरीकुमारी यादवले काभ्रेपलाञ्चोकको नालामा रहेका सूर्य ग्यास उद्योग र सगरमाथा ग्यास उद्योगको निरीक्षण गर्नुभएको छ।
उपभोक्ताहरूले बजारमा ग्यासको अत्यधिक अभाव भएको गुनासो गरेपछि मन्त्री यादवले दुईवटै ग्यास उद्योगको स्थलगत निरीक्षण गर्नुभएको हो।
निरीक्षणका क्रममा उद्योगीहरूले विगतमा जस्तै अहिले पनि बजारमा ग्यासको आपूर्ति सहज रूपमा भइरहेको दाबी गरेका छन्। उपभोक्ताहरूले आफूलाई आवश्यकताभन्दा बढी ग्यास खरिद गरी सञ्चित गर्न थालेकाले बजारमा ग्यास अभाव भएजस्तो देखिएको उद्योगीहरूको भनाइ छ।
मन्त्री यादवले ग्यासको अभाव हुन नदिन व्यावसायिक प्रयोजनभन्दा घरायसी प्रयोजनलाई प्राथमिकतामा राखेर ग्यासको बिक्री–वितरण गर्न उद्योगीहरूलाई निर्देशन दिनुभएको छ। उहाँले उपभोक्ताको दैनिक आवश्यकता पूरा हुने गरी ग्यासको आपूर्ति र वितरण व्यवस्थालाई सहज बनाउनसमेत आग्रह गर्नुभएको छ।
