काठमाडौं । सरकारले धितोपत्र बोर्डको अध्यक्ष नियुक्तिका लागि खुला प्रतिस्पर्धाबाट दरखास्त आह्वान गरेको छ ।
धितोपत्र बोर्डको अध्यक्ष पदमा नियुक्तिका लागि अर्थमन्त्रालयले गठन गरेको सिफारिस समितिले आज दरखास्त आह्वान गरेको हो । दरखास्त दिने समय १५ दिन दिइएको छ ।
धितोपत्र बोर्डको अध्यक्ष नियुक्तिका लागि दरखास्त दिन कम्तिमा स्नातकोत्तर उपाधि हासिल गरेको हुनुपर्ने छ । यसैगरी धितोपत्र बजार व्यवस्थापन, पूँजी बजार विकास, आर्थिक, वित्तीय, वाणिज्य, व्यवस्थापन वा कानुनको क्षेत्रमा कम्तिमा ७ वर्ष काम गरेको लब्धप्रतिष्ठित व्यक्त हुनुपर्ने छ । ३० वर्ष उमेर पूरा भई ६५ वर्ष ननाघेका व्यक्तिले आवेदन दिन सक्ने छन् ।
यसअघि अर्थ मन्त्रालयले बोर्डको अध्यक्ष पदमा नियुक्तिका लागि सिफारिससम्बन्धी कार्यविधि जारी गरेको थियो ।
कार्यविधिमा बोर्डको अध्यक्षका लागि मान्यता प्राप्त विश्वविद्यालयबाट कम्तीमा स्नातकोत्तर उपाधि हासिल गरी धितोपत्र बजार व्यवस्थापन, पुँजी बजार विकास, आर्थिक, वित्तीय, वाणिज्य, व्यवस्थापन वा कानुन क्षेत्रमा कम्तीमा ७ वर्ष काम गरेका लब्ध प्रतिष्ठित व्यक्ति हुनेपर्ने योग्यता तोकिएको थियो । साथै, आवेदक नेपालको नागरिक र उच्च नैतिक चरित्र भएको हुनुपर्नेछ ।
उम्मेदवारको मूल्यांकनका लागि १०० पूर्णाङ्कलाई विभिन्न अंक भारमा विभाजन गरिएको छ । जसमा व्यावसायिक कार्ययोजनाको अंक भार ४०, शैक्षिक योग्यताको १२, व्यावसायिक कार्ययोजनाको प्रस्तुतीकरणको १८ र अन्तर्वार्ताको ३० गरी १०० पूर्णाङ्कमा मूल्यांकन हुनेछ ।
