काठमाडौँ । च्याम्पियन्स लिग फुटबल अन्तर्गत फ्रेन्च क्लब पेरिस सेन्ट जर्मेन (पिएसजी)ले जित निकालेको छ । अन्तिम १६ को पहिलो लेग अन्तर्गत गएराति भएको खेलमा पिएसजीले स्पेनिस क्लब रियल सोसिडाडलाई २–० गोलले पराजित गरेको हो ।
घरेलु मैदानमा पिएसजीलाई जित दिलाउन खेलको ५८ औं मिनेटमा किलियन एमबाप्पेले तथा ७० औं मिनेटमा ब्राडली बार्कोलाले गोल गरे ।
यस्तै, गएराति नै भएको अर्को खेलमा इटालियन क्लब लाजिओले जर्मन क्लब बायर्न म्युनिखलाई हरायो । घरेलु मैदानमा लाजिओलाई जित दिलाउन एकमात्र निर्णायक गोल किरो इमोविलेले गरे । उनले ६९ औं मिनेटमा पेनाल्टीमा गोल गरेका हुन् । खेलको ६७ औं मिनेटमा डायोट उपामेकानोले रातो कार्ड खाएपछि बायर्न १० खेलाडीमा समेटिएको थियो ।
जितसँगै पिएसजीले २–० र लाजिओले १–० को एग्रिगेट बनाएका छन् । यी टोलीहरुको दोस्रो लेगका खेलहरु मार्च ६ मा हुनेछन् । जसमा सोसिडाड र बायर्नको घरेलु मैदानमा खेलहरु खेलिनेछ ।
