काठमाडौँ । विश्वकप लिग–२ को बिहीबारबाट त्रिवि क्रिकेट मैदान, कीर्तिपुरमा सुरु हुँदैछ । जसअन्तर्गतको नामिबियाविरुद्धको पहिलो खेलमा अलराउन्डर दीपेन्द्रसिंह ऐरी उपलब्ध नहुने भएका छन् । दीपेन्द्र अहिले आइएल टी–२० का लागि युएईमा छन् ।
दीपेन्द्र समिलित टोली गल्फ जायन्ट्सले बुधबार टी–२० को क्वालिफायरमा प्रतिस्पर्धा गर्दैछ । उनी बुधबारको खेलमा टोलीसँग रहने भएकाले बिहीबारको पहिलो खेलमा नेपाली टोलीमा रहने छैनन् ।
नेपालले आगामी जुनमा अमेरिका र वेस्ट इन्डिजमा टी–२० विश्वकप खेल्दै छ । आइएल टी–२० मा दीपेन्द्रले विश्वस्तरीय खेलाडीहरुसँग खेल्ने अवसर पाएकाले टी–२० विश्वकपका लागि उनको अनुभव टोलीका लागि उपयोगि हुनेछ ।
नेपाली समयअनुसार आज राति ८ः१५ मा दीपेन्द्र सम्मिलित जायन्ट्सले एमआई इमिरेट्सको सामना गर्दैछ । आजको खेल जितेमा टोली सिधै फाइनल पुग्नेछ । आज हारेको अवस्थामा भने भोलि दोस्रो क्वालिफायरमा प्रतिस्पर्धा गर्नेछ । नेपालले लिग–२ अन्तर्गत बिहीबार नामिबिया र शनिबार नेदरल्यान्ड्ससँग प्रतिस्पर्धा गर्नेछ ।
लिग–२ खेल्ने नेपाली टोलीको घोषणा गरिएको छ । क्यानडासँगको तीन खेलको एकदिवसीय क्रिकेटमा राम्रो प्रदर्शन गरेका अनिल शाह र देव खनाललाई समेट्दै रोहित पौडेलको कप्तानीमा १५ सदस्यीय टोली घोषणा गरिएको छ ।
