काठमाडाैँ । पृथ्वी राजमार्गअन्तर्गत कृष्णभीरमा निर्माण गरिएको वैकल्पिक सडक मार्ग पुनः जोखिममा परेको छ ।
गत भदौ १० गते भोटेकोशी र त्रिशूली नदीमा आएको विनाशकारी बाढीका कारण मुख्य सडक खण्डमा क्षति पुगेपछि यातायात सञ्चालन सहज बनाउन निर्माण गरिएको नयाँ ट्रयाकको तल्लो भागबाट त्रिशूली नदीले निरन्तर कटान गरिरहेको छ । नदीको कटानका कारण सडकको जग कमजोर बन्दै गएपछि वैकल्पिक मार्गसमेत भासिने जोखिम बढेको हो ।
बाढीपछि तत्काल यातायात सञ्चालनमा ल्याउने उद्देश्यले निर्माण गरिएको ट्रयाकको तल्लो तटीय क्षेत्रमा नदीले निरन्तर जमिन कटान गरिरहेको छ । पछिल्लो समय लगातार भइरहेको वर्षाका कारण नदीको बहाव बढ्दा कटान थप तीव्र बनेको बताइएको छ ।
कृष्णभीरको भौगोलिक अवस्था यसअघि नै संवेदनशील मानिँदै आएको छ । त्यसमाथि नदी कटान नरोकिँदा नयाँ ट्रयाक नै बग्ने अवस्था आउन सक्ने जोखिम देखिएको छ । तत्काल नदी नियन्त्रण तथा सडक संरक्षणका प्रभावकारी उपाय अवलम्बन नगरिए पुनः राजमार्ग सम्पर्क विच्छेद हुन सक्ने सरोकारवालाहरूले बताएका छन् ।
पृथ्वी राजमार्गका विभिन्न सात स्थानमा पहिरोका कारण सडक अवरुद्ध हुँदै आएको अवस्थामा कृष्णभीरको वैकल्पिक मार्गसमेत जोखिममा परेपछि यातायात सञ्चालनमा थप चुनौती देखिएको छ ।
सडक डिभिजन कार्यालयले प्राविधिक टोली परिचालन गरी सडकको अवस्थाबारे अनुगमन गरिरहेको भए पनि तीव्र नदी कटान नियन्त्रण गर्नु चुनौतीपूर्ण बनेको छ । काठमाडौंलाई देशका विभिन्न जिल्लासँग जोड्ने प्रमुख मार्गका रूपमा रहेको पृथ्वी राजमार्गको कृष्णभीर खण्डमा तत्काल दीर्घकालीन समाधान खोज्नुपर्ने आवश्यकता देखिएको छ ।
वैकल्पिक सडकसमेत असुरक्षित बन्दै गएपछि हजारौं यात्रु तथा ढुवानी सेवामा प्रत्यक्ष असर पर्न सक्ने देखिएको छ । नदी कटानले नयाँ ट्रयाक नै बगाउने जोखिम बढेपछि सडकलाई कसरी सुरक्षित बनाउने भन्ने विषयमा स्थानीय तथा सरोकारवालाले चासो व्यक्त गरेका छन्।
