काठमाडाैँ । कुलेखानी ड्याममा पानीको सतह बढेर ढोका खोल्नुपर्ने अवस्था आए तल्लो तटीय क्षेत्रमा साइरन बजाएर पूर्वसूचना दिने व्यवस्था गरिएको छ ।
कुलेखानी प्रथम जलविद्युत केन्द्रले ड्यामको तल्लो तटीय क्षेत्रमा बग्ने खोला तथा नदी किनार आसपासका बासिन्दालाई सतर्क रहन आग्रह गरेको हो । ड्याममा पानीको सतह बढ्दै गएर ढोका खोल्नुपर्ने अवस्था आएमा सम्भावित जोखिमबाट बचाउन साइरनमार्फत पूर्वचेतावनी दिइने केन्द्रले जनाएको छ ।
केन्द्रका अनुसार साइरन बजेको अवस्थामा नदी तथा खोला किनार आसपासका बासिन्दाले विशेष सावधानी अपनाउनुपर्नेछ । तेस्रो पटक वा लगातार साइरन बजेको अवस्थामा नदी किनार तत्काल छाडेर उच्च तथा सुरक्षित स्थानमा जान केन्द्रले अनुरोध गरेको छ ।
बाढीको जोखिमलाई ध्यानमा राख्दै स्थानीय बासिन्दाले साइरनको संकेतलाई गम्भीर रूपमा लिई सुरक्षित स्थानतर्फ जान र नदी तथा खोला किनारमा नबस्न केन्द्रले आग्रह गरेको छ।
