एजेन्सी । इंग्लिस प्रिमियर लिग फुटबलमा शीर्षस्थानको आर्सनलले रोमाञ्चक जित निकालेको छ । बुधबार बिहान सम्पन्न खेलमा आर्सनलले लुटन टाउनलाई उसकै मैदानमा ४–३ गोलले पराजित गरेको हो ।
आर्सनलको जितमा डेक्लान राइस नायक बने । उनले अन्तिम समयमा गोल गर्दै आर्सनललाई उद्धार गरे । निर्धारित ९० मिनेटको समयमा थप ६ मिनेट समय थपिएको थियो । त्यसको पनि अन्तिममा आर्सनललाई अन्तिम अवसर थियो । कप्तान मार्टिन ओडेगार्डले क्रस गरेको बलमा उनले हेडरमार्फत गोल गरे ।
त्यसअघि खेलको २० औं मिनेटमा गाब्रियल मार्टिनेलीले गोल गर्दै आर्सनललाई सुरुवाती अग्रता दिलाएका थिए । २५ औं मिनेटमा गाब्रियल ओशोले गोल गर्दै लुटनलाई १–१ गोलको बराबरीमा ल्याए ।
४५ औं मिनेटमा गाब्रियल जेससले गोल गर्दै आर्सनललाई २–१ गोलले अघि बढाए । यता ४९ औं मिनेटमा एलिजा अडेबायोले गोल गर्दै लुटनलाई २–२ गोलको बराबरीमा ल्याए । यता, ५७ औं मिनेटमा रोस बार्कलीले गोल गर्दै घरेलु टोली लुटनलाई ३–२ ले अघि बढाए ।
६० औं मिनेटमा काई हाभेट्र्जको गोलबाट आर्सनलले खेलमा ३–३ को बराबरी गर्यो । त्यसपछि अन्तिम समयमा राइसले गोल गर्दै आर्सनललाई महत्वपूर्ण तीन अंक दिलाए ।
योसँगै आर्सनलले १५ खेलबाट ३६ अंक जोडेको छ । दोस्रो स्थानको लिभरपुलको १४ खेलबाट ३१ अंक छ । पराजित लुटन भने १५ खेलबाट ९ अंकका साथ १७ औं स्थानमा छ ।
