एजेन्सी । विश्वकप २०२३ को ३७ औँ खेल आज भारत र दक्षिण अफ्रिकाबीच कोलकाताको इडेन गार्डेनमा हुँदैछ । यो खेलमा सबैको नजर विराट कोहलीमाथि हुनेछ । आज उनको जन्मदिन पनि हो । विराट ३५ वर्षका भइसकेका छन् ।
उनी एकदिवसीयमा सचिन तेन्दुलकरको ४९ शतकको रेकर्डबाट एक शतक मात्र टाढा छन् । यदि विराटले आफ्नो जन्मदिनमा यो कीर्तिमान बराबरी गरे भने यो फ्यानका लागि उपहारभन्दा कम हुनेछैन । विराटको नाममा अहिलेसम्म ४८ ओडीआई शतक छ ।
यो विश्वकपमा विराटको कीर्तिमान पनि उत्कृष्ट रहेको छ । उनले सात खेलका सात इनिङ्समा ८८.४० को औसतमा ४४२ रन बनाएका छन् । जसमा एक शतक र चार अर्धशतक समावेश छ ।
यसअघिका केही अवसरमा उनले शतक बनाउन गुमाएका थिए । तर, विराट यस खेलमा शतक बनाएर फ्यानहरूलाई खुसी हुने मौका दिन चाहन्छन् । विराटले अहिलेसम्म एकदिवसीय क्रिकेटका २८८ खेलका २७६ इनिङ्समा ५८.०५ को उत्कृष्ट औसतमा १३ हजार ५२५ रन बनाएका छन् । जसमध्ये ४८ शतक र ७० अर्धशतक रहेका छन् । १८३ रन उनको उत्कृष्ट स्कोर हो ।
दक्षिण अफ्रिकाविरुद्धको कीर्तिमान राम्रो भएकाले विराटको शतक बनाउने सम्भावना पनि उच्च छ । यस टोलीविरुद्ध ३० ओडीआईका २८ इनिङ्समा उनले ६१ को औसत र ८५.९२ को स्ट्राइक रेटमा १४०३ रन बनाएका छन् । जसमा चार शतक र आठ अर्धशतक समावेश छ ।
दक्षिण अफ्रिकाविरुद्धको एकदिवसीयमा विराटको उत्कृष्ट स्कोर १६० रन रहेको छ । तर, उनले इडेन गार्डेनमा यो टोलीविरुद्ध एकदिवसीय खेल खेलेका छैनन् । विराटको इडेन गार्डेनमा राम्रो कीर्तिमान छ र यो मैदानमा एकदिवसीय क्रिकेटमा भारतीय ब्याट्सम्यानहरूमध्ये कोहली तेस्रो सर्वाधिक स्कोरर हुन् । विराटले सात खेलको सात इनिङ्समा ४७.१४ को औसतमा ३३० रन बनाएका छन् । जसमा एक शतक र तीन अर्धशतक सामेल छन् ।
तीनवटै ढाँचामा विराटले इडेन गार्डेनमा १६ खेल खेलेका छन् । उनले १९ इनिङ्समा ४६.५८ को औसतमा ७९२ रन बनाएका छन् । जसमा तीन शतक र पाँच अर्धशतक समावेश छ । दक्षिण अफ्रिकाविरुद्धको भारतीय पिचमा विराटको कीर्तिमान पनि उत्कृष्ट छ ।
भारतमा यो टोलीविरुद्ध उनले नौ खेलको आठ इनिङ्समा ४१.७५ को औसतमा ३३४ रन बनाएका छन् । जसमा एक शतक र दुई अर्धशतक समावेश छ । यस्तो अवस्थामा विराटले आज शतक प्रहार गरेर फ्यानहरूलाई फेरि मौका दिने अपेक्षा गरिएको छ ।
