काठमाडौँ । आईसीसी टी–२० विश्वकप एसिया छनोट अन्तर्गत ओमानले लगातार दोस्रो जित निकालेको छ ।
समूह ‘ए’ अन्तर्गत मंगलबार कीर्तिपुरस्थित त्रिवि क्रिकेट मैदानमा भएको खेलमा ओमानले सिंगापुरलाई २२ रनले पराजित गरेको हो । ओमानले दिएको १७५ रनको लक्ष्य पछ्याएको सिंगापुरले २० ओभरमा ८ विकेट गुमाएर १५२ रन मात्र बनाउन सक्यो ।
सिंगापुरका लागि सुरेन्द्रन चन्द्रमोहनले सर्वाधिक ४१ र मनप्रित सिंहले ३१ रन बनाए ।
बलिङतर्फ ओमानका बिलाल खान र फयज बटले समान २ विकेट लिए । त्यसअघि टस हारेर पहिले ब्याटिङ गरेको ओमानले अकिब इल्यासको अर्धशतकीय इनिङ्समा ६ विकेट गुमाएर १७४ रन बनाएको थियो ।
अकिबले ३५ बलमा सर्वाधिक ६३ रन बनाए । उनले ४ चौका र ४ छक्का प्रहार गरे । यस्तै, कप्तान जिसान मक्सुदले १६ बलमा २६ रन बनाए ।
सिंगापुरका लागि जनक प्रकाश, रमशे कालिमुथु र अनिश परमले समान दुई–दुई विकेट लिए । यसअघिको पहिलो खेलमा ओमानले मलेसियालाई ३२ रनले पराजित गरेको थियो । आजको जितसँगै ओमान सेमिफाइनल नजिक पुगेको छ ।
समूह ‘ए’ मा २ खेलबाट ४ अंकसहित ओमान शीर्ष स्थानमा रहेको छ ।
