काठमाडौं । आइसिसी टि२० विश्वकप एसिया क्षेत्र छनोट भोली (सोमबार) देखी नेपालमा सुरु हुँदैछ । भोली नेपालले पहिलो म्याच सिंगापुरविरुद्ध खेल्दैछ । किर्तीपुरस्थित टियू मैदानमा हुन लागेको खेल बिहान नौ बजेदेखि सुरु हुनेछ ।
प्रतियोगिताअघि आज पत्रकारसँगको अन्तरक्रियामा बोल्दै कप्तान रोहित पौडेलले सन्दीपको कमब्याकमा आफू उत्साहित रहेको बताएका छन् । उनले सन्दीप आएपछि टीममा ब्यालेन्स भएको बताए । उनले भने ‘उहाँ अनुभवी र राम्रो बलर हुनुहुन्छ । उहाँको उपस्थिति महत्वपूर्ण छ’।
रोहितले विगत ६-७ महिनादेखि नेपाली टीमले राम्रो खेलिरहेको बताए । उनले त्रिकोणात्मक सिरिजको फाइनलमा केही गल्तीका कारण हार्नुपरेको बताए । ‘हामीले सुरूको १० ओभरमा राम्रो ब्याटिङ गरिरहेका थियौं । तर, पछाडिको १० ओभरमा कोल्याप्स भयो । दिप्पीदाइ र मेरो विकेट महत्वपूर्ण थियो।’ उनले भने, ‘हामी लचक हुनुपर्छ । ओपनरहरू फिक्स्ड हुन्छ, अरु आवश्यकता अनुसार तलमाथि गर्न सकिन्छ ।’
कप्तान पौडेलले कुनै पनि टीमलाई कमजोररूपमा नलिइने र आफुहरुको तर्फबाट बेस्ट क्रिकेट खेल्ने बताए ।
यस्तै, नेपाली टीमका प्रशिक्षक मोन्टी देशाईले घरेलु मैदानमा हुन गइरहेको प्रतियोगितामा नेपालका लागि ठूलो अवसर भएको बताए । देसाईले विपक्षी टीमहरूलाई कमजोर लिन नहुने बताउदै भने,हामी केही समयदेखि राम्रो खेलिरहेका छौं । आफ्नो कमजोरीहरूमा सुधार गरेका छौं । सबै खेलाडीलाई आफ्नो रोल र गेम प्लान थाहा छ । हामी आफ्ना बलिङ र ब्याटिङ दुवैमा विश्वस्त छौं ।’
प्रशिक्षक देशाईले त्रिकोणात्मक सिरिजको फाइनलमा भोगेको हारलाई बिर्सिएर अघि बढ्ने र ‘वान गेम एट अ टाइम’ मन्त्रसहित अघि बढ्ने बताए । साथै उनले सन्दीपको उपस्थिती महत्वपूर्ण रहेको बताए । ‘सन्दीपलाई अलिकति ब्रेक चाहिएको थियो । अब ऊ नयाँ इनर्जीका साथ ड्रेसिङ रूममा फर्किएको छ । उसको उपस्थितिले धेरै फरक पर्नेछ’ उनले भने ।
नेपालको समूह ‘ए’ मा सिंगापुर, ओमान र मलेसिया रहेका छन् । समूह ‘बी’मा यूएई, हङकङ, कुवेत र बहराइन रहेका छन् । समूह ‘ए’बाट नेपाल र ओमान तथा समूह ‘बी’बाट यूएई र हङकङ सेमिफाइनलका दावेदार हुन् । नेपाल उपाधिको दावेदारसमेत हो । फाइनलमा पुग्ने दुई टीमले आगमी वर्ष अमेरिका र वेस्टइन्डिजमा हुने टि-२० विश्वकप खेल्न पाउनेछन् ।
