चर्चित भारतीय क्रिकेट लिग इन्डियन प्रिमियर लिग (आइपीएल) को लिलामी (अक्सन) आगामी डिसेम्बर १९ मा दुबईमा हुने भएको छ । भारत बाहिर अक्सन हुन लागेको यो पहिलो पटक हो ।
आइपीएलका क्लबहरुले नोभेम्बर १५ सम्ममा आफूले राख्न चाहेका र बिक्री गर्न वा छाड्न चाहेका खेलाडीको सूची सार्वजनिक गरिसक्नु पर्ने आइपीएलले जनाएको छ । यसपछि डिसेम्बरको सुरुतिर खेलाडीको अन्तिम सूची सार्वजनिक गरिने आइपीएलले जनाएको छ ।
आगामी सन् २०२४ को सिजनका लागि प्रत्येक टिमले खेलाडी किन्न १०० करोड भारतीय रुपैयाँ (करिब १ करोड २० लाख डलर) बराबर खर्च गर्न पाउने छन् । गत वर्षभन्दा यो पाँच करोड बढी हो ।
यो रकम हरेक टिमले अक्सनका दिन अनिवार्य रुपमा खर्च गर्नुपर्ने नियम छ । क्लबहरुले अघिल्लो बर्ष खर्च नभएको रकम समेत यस पटक जोड्न पाउने छन् ।
हाल पञ्जाब टिमसँग सबैभन्दा बढी रकम छ । यससँग १२ करोड भारु छ जबकी मुम्बई इन्डियन्ससँग ५ लाख मात्र छ ।
आइपीएलमा पञ्जाब, मुम्बई सहित सनराइजर्स हैदराबाद, गुजरात टाइटन्स, डेल्ही क्यापिटल्स, लखनऊ सुपर जाइन्टस्, मुम्बई इन्डियन्स, राजस्थान रोयल्स, कोलकाता नाइट राइडर्स, चेन्नाई सुपर किंग्स रहेका छन् ।
गत सिजनमा पञ्जाबमा आबद्ध साम करन सर्वाधिक महंगा खेलाडी थिए । क्लबले उनलाई १८.५ करोड भारुमा खरिद गरेको थियो ।
आगामी सिजनमा पनि धेरै विदेशी खेलाडीले आइपीएल खेल्ने सम्भावना छ । एएनआई न्यूज एजेन्सीका अनुसार अस्ट्रेलियाका तिब्र गतिका बलर मिचेल स्टार्क, प्याट कमिन्स, ट्राभिस हेड, क्रिस वोक्स, अलेक्स हेल्स, साम बिलिङ्स, गेराल्ड कोजी सूचीमा रहने छन् ।
हाल भारतमै जारी विश्वकपमा खेलाडीले गर्ने प्रदर्शनले पनि आइपीएलमा प्रभाव पार्नेछ ।
