आइसिसी विश्वकप क्रिकेट अन्तर्गत मुम्बईको वान्खडे रंगशालामा जारी दिवारात्रि खेलमा दक्षिण अफ्रिकाले अलराउन्ड प्रदर्शन गरेसँगै इङल्यान्ड दबाबमा परेको छ ।
टस हारेर ब्याटिङको निम्तो पाएको दक्षिण अफ्रिकाले सात विकेटको क्षतिमा ३९९ रनको विशाल स्कोर खडा गरेको थियो । अफ्रिकाका लागि हेनरिक क्लासेनले ६७ बलमै १०९ रन प्रहार गरेका थिए । पछिल्लो क्रममा आएका मार्को यान्सेनले ४२ बलमै ७५ बनाएर इङल्यान्डको बलिङ आक्रमण तहसनहस पारेका थिए । उनले ६ छक्का र ३ चौका हानेका थिए ।
यस्तै रिज हेन्ड्रीकले ८५, भान डर डुसेनले ६०, कप्तान एडेन मार्करमले ४२ रन बनाएका थिए ।
४०० रनको विशाल लक्ष पछ्याएको इङल्यान्ड संकटमा परिसकेको छ । पछिल्लो ताजा विवरण अनुसार, १२ ओभरमा इङल्यान्डले ६ विकेट गुमाएर ६८ रन मात्र बनाएको छ ।
इङल्यान्डका ब्याट्सम्यानहरु जोनी बेयरस्टो (१०), डेविड मलान (६), जो रुट (२), बेन स्टोक (५), जस बट्लर (१५), ह्यारी ब्रुक (१७) आउट भइसकेका छन् । क्रिजमा अहिले डेविड विल्ली र अदिल रशिद छन् ।
अफ्रिकाका लागि मार्को यान्सेन र गेराल्ड कोजीले २/ २ तथा लुंगी एन्गिडी र कागिसो राबाडाले १/ १ विकेट लिएका छन् ।
यो खेल जितेमा दक्षिण अफ्रिकाले ४ खेलबाट ६ अंक प्राप्त गर्नेछ ।