![](https://newspolar.com/wp-content/uploads/2023/09/bangladesh-toss.jpg)
एजेन्सी । एसिया कपको अन्तिम सुपर–४ खेलमा बंगलादेशले भारतलाई जितका लागि २६६ रनको लक्ष्य दिएको छ ।
टस हारेर पहिले ब्याटिङ गरेको टोलीले निर्धारित ५० ओभरमा ८ विकेट गुमाएर २६५ रन बनाएको हो ।
कोलम्बोको आर प्रेमदासा स्टेडियममा पहिले ब्याटिङमा आएको बंगलादेशको सुरुवात खराब रह्यो । टोलीले २८ रनमा शीर्ष ३ विकेट गुमाएको थियो । टोलीले १० ओभरमा ४४ रन बनाएको थियो ।
नम्बर ४ मा खेल्न आएका बंगलादेशका कप्तान शकिब अल हसनले आफ्नो एकदिवसीय करियरको ५५ औं अर्धशतक बनाए । उनले ६५ बलमा अर्धशतक पूरा गरे । शकिबले ८५ बलमा ८० रनको इनिङ खेले । शकिबले ९४.१२ को स्ट्राइक रेटमा रन बनाए । उनले ६ चौका र ३ छक्का प्रहार गरे ।
यस्तै, तौहीद हृदयले आफ्नो एकदिवसीय करियरको पाँचौं अर्धशतक बनाए । उनी ५४ रन बनाएर आउट भए । उनलाई मोहम्मद शामीले तिलक वर्माको हातमा क्याच आउट गरेका थिए । तौहिदले ८१ बलको इनिङ्समा ६६.६७ को स्ट्राइक रेटमा रन बनाए । उनले ५ चौका र २ छक्का प्रहार गरे ।
५९ रनमा मेहदी हसन मिराजको विकेट गुमाएपछि कप्तान शकिब अल हसनले तौहिदसँग ५औं विकेटका लागि शतकीय साझेदारी गरे । दुवैले ११५ बलमा १११ रनको साझेदारी गरे । यो शतकीय साझेदारीलाई शार्दुल ठाकुरले शकिबलाई आउट गरेर तोडेका थिए ।
भारतीका लागि शार्दुल ठाकुरले ३ विकेट लिए । मोहम्मद शामीले २ विकेट लिए ।
भारतीय कप्तान रोहित शर्माले खेलमा ५ परिवर्तन गरेका छन् । विराट, हार्दिक, बुमराह, सिराज र कुलदीपलाई विश्राम दिइएको छ भने तिलक वर्मा, प्रसिद्ध कृष्ण, सूर्यकुमार यादव, मोहम्मद शामी र शार्दुललाई मौका दिइएको छ ।