काठमाडौँ । नेकपा एमालेले नेपाल प्रहरीको केन्द्रीय अनुसन्धान ब्यूरो (सीआईबी) लाई निकम्मा बनाएको आरोप लगाएको छ ।
मंगलबार प्रतिनिधिसभाको विशेष समय बोल्दै एमालेका मुख्य सचेतक पदम गिरीले सुन तस्करी प्रकरणमा जोडिएका प्रधानमन्त्री निकटका व्यक्तिहरुलाई सामान्य सोधपुछसमेत नगरिएको आरोप लगाउनुभयो ।
“अहिले सीआईबीलाई निकम्मा बनाउने काम भयो”, उहाँले भन्नुभयो “सत्ता पक्षका नेता देखिएपछि सीआईबीले अनुसन्धानसमेत गर्न सकिरहेको छैन ।”
मुख्य सचेतक गिरीले प्रधानमन्त्री पुष्पकमल दाहाल प्रचण्डले सुशासनको गफ दिने तर व्यवहारमा भ्रष्ट्राचारीलाई उन्मुक्ति दिने गरेको आरोप लगाउनुभयो ।
गिरीले भ्रष्टाचारका नाइके, राजनीतिक दलको उपल्लो तहका नेतालाई छानबिनको दायरामा नै नल्याई उन्मुक्ति दिने गरिएको उल्लेख गर्दै भन्नुभयो, “तर भरियालाई जेलमा हाल्ने काम हुँदैछ ।”
गिरीले नेपाली कांग्रेसका सांसद सुनिल शर्माले न्याय र सुशासनको पक्षमा बोल्दा पक्राउ पुर्जी समेत नदिएर पक्राउ गरिएको आरोप लगाउनुभयो ।
सांसद गिरीले पटकपटक भएका तस्करीका कारण गणतन्त्रलगायत उपलब्धि गुम्ने अवस्थाको सिर्जना भएको बताउनुभयो ।
ललितानिवासको जग्गा अनियमितता प्रकरणमा पक्राउ परेकालाई ६० दिनसम्म थुनामा राखेर संगठित अपराधमा मुद्दा नचलाई सरकारी कागजात किर्तेको कसुरमा मात्र मुद्दा चलाएको भन्दै उहाँले आपत्ति प्रकट गर्नुभयो । “के लेनदेन मिलेर हो? ६० दिनसम्म थुनामा राखेर संगठित अपराधमा नभएर किर्तेमा मुद्दा चलाइयो ?” उहाँले प्रश्न गर्नुभयो ।
