एजेन्सी । इंग्लिस प्रिमियर लिग फुटबल अन्तर्गत आर्सनलले लगातार दोस्रो जित निकालेको छ ।
गएराति भएको खेलमा आर्सनलले क्रिस्टल प्यालेसलाई १–० गोलले पराजित गरेको हो ।
क्रिस्टल प्यालेसको घरेलु मैदान सेलहर्स्ट पार्कमा आर्सनललाई जित दिलाउन खेलको ५३ औं मिनेटमा कप्तान मार्टिन ओडेगार्डले पेनाल्टीमार्फत गरेको गोल नै निर्णायक गोल बन्यो ।
प्यालेसका गोलकिपर साम जोनस्टोनले आर्सनलका एड्डी केटियाहलाई पोस्टभित्र लडाएपछि आर्सनलले पेनाल्टी पाएको थियो । जसलाई कप्तान ओडेगार्डले खेर जान दिएनन् ।
दुई लण्डन क्लबहरुको खेल प्रतिस्पर्धात्मक बनेको थियो । खेलको ६७ औं मिनेटमा ताकेहिरो टोमियासुले रातो कार्ड खाँदै मैदानबाट बाहिरिएपछि आर्सनल १० खेलाडीमा समेटिएको थियो ।
जितसँगै आर्सनल २ खेलबाट ६ अंकसहित तेस्रो स्थानमा उक्लिएको छ । प्यालेस ३ अंकका साथ ११ औं स्थानमा छ ।
