एजेन्सी । भारतीय क्रिकेट टिमका पूर्व कप्तान महेन्द्र सिंह धोनीले सन्यास लिएको आज तीन वर्ष पूरा भएको छ । धोनीले १५ अगस्ट २०२० मा अन्तर्राष्ट्रिय क्रिकेटबाट सन्यासको घोषणा गरेका थिए ।
विकेटकिपर–ब्याट्सम्यानले इन्स्टाग्राममा एक भिडियो साझा गर्दै पोस्टको क्याप्शनमा लेखेका छन् – ‘तपाईं सबैको माया र समर्थनको लागि धेरै धेरै धन्यवाद ।’
धोनी २००७ मा आईसीसी पुरुष टी–२० विश्वकप, २०११ मा आईसीसी पुरुष क्रिकेट विश्वकप र २०१३ मा आईसीसी च्याम्पियन्स ट्रफी जित्ने भारतीय टोलीका कप्तान थिए ।
धोनीले पछिल्लो पटक अन्तर्राष्ट्रिय क्रिकेटमा एकदिवसीय विश्वकप २०१९ को सेमिफाइनल खेलेका थिए । म्यानचेस्टरमा ९ जुलाई २०१९ मा न्यूजिल्याण् विरुद्ध खेलिएको सेमिफाइनलमा धोनीले ७२ बलमा ५० रन बनाएका थिए ।
तल्लो ब्याटिङ अर्डरका ब्याट्सम्यान धोनीले २ सय ४० रनको लक्ष्य पछ्याउँदै थिए । मार्टिन गप्टिलको थ्रोमा उनी २ इन्चले क्रिज गुमाएका थिए । भारतले यसै २ इन्चले विश्वकप गुमाएको अनुमान गरिएको थियो ।
धोनीले आफ्नो पहिलो खेल २३ डिसेम्बर २००४ मा बंगलादेशविरुद्ध चटगाउँमा खेलेका थिए । गांगुली त्यतिबेला कप्तान थिए । गांगुलीले आफ्नो स्थानमा धोनीलाई नम्बर ३ मा ब्याटिङका लागि पठाए ।
धोनी डेब्यु खेलमै रनआउट भएका थिए । यो सिरिजमा धोनी फ्लप भए । उनले तीन ओडीआईमा १९ रन मात्र बनाए तर पाकिस्तानविरुद्धको अर्को शृङ्खलामा १२३ बलमा १४८ रनको अविस्मरणीय इनिङ खेलेपछि उनी टोलीको सबैभन्दा भरपर्दो खेलाडी बने ।
धोनी जुलाई ७ मा ३९ वर्षका भए । उनको जन्म रांची, झारखण्ड (तत्कालीन बिहार) मा भएको थियो। धोनीले अहिलेसम्म सबैभन्दा बढी २०० ओडीआईमा भारतको कप्तानी गरेका छन् । जसमा भारत ११० खेलमा विजयी भएको थियो । उनी एकदिवसीयमा सबैभन्दा धेरै कप्तानी गर्ने विश्वका तेस्रो कप्तान हुन् ।
धोनीले अहिलेसम्म ९० टेस्ट, ३५० एकदिवसीय र ९८ टी–२० खेलिसकेका छन् । जसमा उनले ४८७६, १०७७३ र १६१७ रन बनाएका छन् ।
